Në tërmetin e fuqishëm që dje i goditi bregun e Egjeut në Turqi dhe ishullin lindor grek Samos, jetën e humbën të paktën 26 persona ndërsa mbi 800 u lënduan.
Ekipet e shpëtimit po depërtojnë nëpër blloqet e betonit nga ndërtesat e rrënuara në kërkim të të mbijetuarve në Izmir, i treti qytet për nga madhësia në Turqi, i cili u godit nga tërmeti.
Pas tërmetit të parë, më të fuqishëm prej thuajse shtatë ballë, kanë pasuar rreth njëqind më të vogla, prej të cilave 16 ishin më të fuqishme prej katër ballë, ndërsa këtë rajon e kaploi “një cunami i vogël”.
Të paktën 24 persona e humbën jetën në Izmir, përfshirë edhe një grua më të vjetër e cila u mbyt, kumtoi shërbimi turk për situata të jashtëzakonshme (AFAD).
Në Samos, dy adoleshentë e humbën jetën pasi është rrënuar një mur mbi ta, ndërsa njëzetë persona janë lënduar. Dy prej të lënduarve, në mesin e të cilëve edhe një djalosh 14-vjeçar janë transferuar në Athinë, ndërsa shtatë janë hospitalizuar në ishull, kumtuan autoritetet lokale.
Epiqendra e tërmetit, i cili sipas Institutit Kandili ka qenë 6,9 ballë, ka qenë në Detin e Egjeut në veri të Samosit, i ka goditur Turqinë dhe Greqinë në orën 14:51 sipas kohës lokale.
Në Turqi, u dridh rajoni nga Deti Egje deri në Detin Marmara, ndërsa prefekti i Stambollit tha se edhe pse është ndjerë tërmeti nuk ka dëme materiale në qytet. Mbi 3.000 shpëtues janë dërguar në Izmir.
