Kuvendi sot e filloi seancën e 13-të në të cilën është dashur të debatohet për Propozimin për emërimin e zëvendës ministrave në Qeveri, por pas një pauze të shkurtër mbledhja është ndërprerë para se të konfirmohet rendi i ditës, sepse Parlamenti nga KSHZ-ja pret raport për verifikimin e mandatit të deputetit, pasi në fillim të kësaj seance u konstatua dorëheqja e deputetit Damjan Mançevskit.
Siç sqaroi kryetari i Kuvendit, Talat Xhaferi duke e pasur parasysh atë që pika për verifikimin e mandatit nuk ka materiale dhe ato priten nga Komisioni Shtetëror i Zgjedhjeve, rendi i ditës do të miratohet në vazhdimin e kësaj seance, për të cilën, siç theksoi, deputetët do të njoftohen në mënyrë shtesë.
“Duke e pasur parasysh atë që deputeti Damjan Mançevski është zgjedhur nga lista e deputetëve, është e nevojshme që KSHZ-ja ta njoftojë Kuvendin për kandidatin nga kjo listë në të cilën duhet t’i verifikohet mandati për deputet në pajtim me nenin 153 nga Kodi zgjedhor”, ka thënë Xhaferi.
Pasi KSHZ-ja do të japë raport, për këtë do të vendos Komisioni amë për çështje të rregullores dhe të mandatit, pas çka do të vazhdojë seanca plenare.
Në këtë seancë në rendin e propozuar të ditës, pika e parë është verifikimi i mandatit të deputetit, ndërsa pika e dytë Propozimi për emërim të zëvendësministrave në Qeveri.
Paraprakisht, Kuvendi i konstatoi edhe dorëheqjet e Venko Stomnarovskit nga funksioni i anëtarit të Këshillit republikan për siguri në komunikacionin rrugor, Sofçe Jovanovska nga funksioni i anëtares së Këshillit për statistikë dhe të Marjana Kacarksa nga funksioni i zëvendëssekretares së përgjithshme të Parlamentit, si dhe ndërprerje të mandatit të Irena Shumkovska nga funksioni i anëtares së Komisionit shtetëror për ankesa për furnizime publike.
Propozimin për zgjedhjen e zëvendësministrave, Qeveria deri tek Kuvendi e dorëzoi të premten e kaluar.
Për zëvendësministër të Mbrojtjes është propozuar, Bashkim Hasani, në Ministrinë e Punëve të Brendshmem Nazim Bushi, ndërsa në resorin e drejtësisë, propozim për zëvendësministër është Agim Nuhiu.
Ilhan Rahman është propozuar për zëvendësministër i cili udhëheq me Ministrinë e Sistemit politik dhe marrëdhënieve mes bashkësive, ndërsa Fatmire Isaki për zëvendësministre të Punëve të Jashtme.
Në Ministrinë e Financave, zëvendësministër do të jetë Dimitar Kovaçevski, ndërsa në Ministrinë e Ekonomisë është propozuar Zoran Manevski. Në dikasterin e bujqësisë për zëvendës është propozuar Trajan Dimkovski.
Doktor Ilir Hasani është propozuar për zëvendësministër në Ministrinë e Shëndetësisë. Arafat Shabani është propozuar në Ministrinë e Arsimit dhe Shkencës, Enver Huseini në Ministrinë e Punës dhe Politikës Sociale, Zoran Dimitrovski në Ministrinë e Vetëqeverisjes Lokale dhe Sedat Sulejmani në Ministrinë e Kulturës.
Për zëvendësministër të Shoqërisë Informatike dhe Administratës është propozuar Aleksandar Bajdevski, në Ministrinë e Transportit dhe Lidhjeve Bekim Rexhepi, ndërsa në Ministrinë e Mjedisit Jetësor dhe Planifikimit Hapësinor, Hristina Oxhaklievska.
burim: mia.mk
