Deputeti i Lëvizjes Besa, Fadil Zendeli ka paralajmëruar sot se në fazën finale të ndryshimeve kushtetuese do të dorëzojë amendamente me të cilat kërkohet që gjuha shqipe, populli shqiptar dhe diaspora shqiptare të precizohen me emërtim të saktë dhe jo me përqindje.
Për amendamentin 34 Besa propozon amendament tek pjesa e komuniteteve ku kërkon të numërohen populli maqedonas, populli shqiptar si dhe qytetarët që u takojnë popujve tjerë. “Gjithashtu brenda preambulës shtojmë një fjali që gjuha shqipe dhe gjuha maqedonase si dy gjuhët më të mëdha janë gjuhë zyrtare”, deklaroi Zendeli. Te amendamenti 36 paragrafi 3, kërkohet që të precizohet se Republika kujdeset për diasporën e popullit maqedonas, diasporën e popullit shqiptar dhe diasporën e popujve tjerë të cilët do të numërohen me radhë. Deputeti Fadil Zendeli thotë se edhe në seancë plenare do të propozojë amendament për shtetësinë në Ligjin kushtetues edhe pse një i tillë u refuzua në komision. Ai thotë se Kushtetuta tek shtetësia ka zgjidhje të mirë ku thuhet qytetarët e Republikës së Maqedonisë, por Qeveria po ndërhyn këtu përmes ligjit kushtetues. “Vetë “slleshi” ka kuptimin ose dhe do të propozojmë që maqedonasit të mund të përdorin shtetësinë Maqedonas ndërsa për qytetarët e tjerë të përdorin qytetarë të Republikës së Maqedonisë së Veriut”, tha deputeti Fadil Zendeli.
A. Zeqiri
