Referendumi i 30 shtatorit, si dhe zhvillimet në rajon, me theks të veçantë mbi dialogun midis Republikës së Kosovës dhe Serbisë, ishim tema nga takimi i sotëm mes kryetarit të Bashkimit Demokratik për Integrim Ali Ahmeti dhe presidentit të Republikës së Kosovës, Hashim Thaçi.
Ahmeti e njoftoi presidentin Thaçi mbi mbarëvajtjen e fushatës për referendum, duke nënvizuar rëndësinë e madhe që ka zbatimi i suksesshëm i marrëveshjes së Prespës.
Ahmeti dhe Thaçi u dakorduan që shqiptarët dhe në përgjithësi të gjithë qytetarët e Maqedonisë duhet të dalin në mënyrë masive dhe të votojnë PRO integrimit në NATO dhe EU.
Bashkëbiseduesit konkluduan që e vetmja e ardhme për vendet e Evropës Juglindore, që siguron paqe të qëndrueshme, siguri dhe stabilitet, është integrimi euroatlantik.
Ahmeti mbështeti tërësisht përpjekjet intensive të institucioneve të Kosovës me ndihmesë ndërkombëtare për zgjidhje përfundimtare të dialogut me Beogradin mbi demarkacionin e kufirit.
“Koha është për një Evropë Juglindore të integruar tërësisht në NATO dhe BE”, ishte porosia që gjatë takimit e dërguan Ahmeti dhe Thaçi. (MIA)
