Ndërtim dhe rikonstruksion të rrjetit rrugor lokal, kanalizim atmosferik dhe rikonstruksion të shkollave fillore, janë projektet për të cilët sot do të nënshkruhen marrëveshje në Ministrinë e Financave. Në kuadër të Projektit për përmirësim të shërbimeve komunale të Ministrisë, gjashtë komuna do të marrin 290,7 milionë denarë për realizim të tetë projekteve kapitale.
Marrëveshjet, siç informoi Ministria e Financave, do të nënshkruhen nga ministri i Financave Dragan Tevdovski dhe kryetarët e komunave të Qendrës Zhupë Arian Ibraim, Zhelinës Blerim Sejdiu, Studeniçanit Azem Sadiku, Kavadarit Mitko Jançev, Ilindenit Zhika Stojanovski dhe Kisella Vodës Filip Temellkovski. Në nënshkrimin e marrëveshjeve do të marrë pjesë edhe drejtori i Zyrës së Bankës Botërore në Maqedoni Marko Mantovanelli.
Në komunën e Zhelinës, do të realizohet rikonstruksion i shkollës fillore në lagjen Pllaticë, në të cilën mësojnë rreth 300 nxënës. Gjithashtu, në komunë do të realizohet rikonstruksion i rrugës lokale në fshatin Grupçin dhe rrugës lokale në Novosellë.
Rikonstruksion të tetë rrugëve dhe bulevardit do të realizohet edhe në komunën Kavadar, ndërsa në komunën Ilinden – rikonstruksion në shtrirjen nga Kadino deri tek qarkorja deri tek autostrada A4. Në komunën e Studeniçanit përveç rikonstruksionit të rrugës parashikohet edhe rregullim parter i pjesës qendrore të vendbanimit Studeniçan.
Në kuadër të marrëveshjeve të cilat sot do të nënshkruhen është edhe projekti për ndërtim të rrugës lokale e cila i lidhë vendbanimet Elevci dhe Dollgash në komunën Qendra Zhupë.
Në komunën Kisella Vodë do të realizohet kanalizim atmosferik i rrugëve në lagjen Përzhinë.
Projektin për përmirësim të shërbimeve komunale e realizon Ministria e Financave, me mbështetje të Bankës Botërore, si edhe të Bashkimit Evropian përmes IPA-s.
Qëllimi i projektit është që përmes investimeve në projekte kapitale të përmirësohen kushtet për jetesë në të gjithë komunat në Maqedoni. Përmes projektit financohen ndërtim dhe rikonstruksion i rrugëve lokale, të rrjetit komunal, ndërtim ose rikonstruksion të shkollave, kopshteve dhe objekteve të tjera publike nëpër komuna. (MIA)
