Zëvendësministri i deritanishëm i Punëve të Jashtme të Kosovës Gjergj Dedaj, i cili tashmë është emëruar për ambasador në Maqedoni, ofendoi të gjithë ata që kundërshtuan emërimin e tij, duke i quajtur “tugjarë lopësh”, “deputetë të turpit”, “gazetarë mercenar” dhe epitete të ngjashme ofenduese, lajmëron korrespodenti i MIA-s nga Prishtina.
“Vazhdoj ne MPJ, në pritje të misionit te ri në Shkup! Nuk po më pihet kafja, kur po dëgjoj çfarë “burrash të kombit” po kërkojnë shkarkimin tim…dhe nuk e di se a e shohin veten në pasqyre ata tugjare lopësh, pronare këpurdhash , (b)analist, “deputet” turpi e “gazetarë” mercenar?!”, ka shkruar Dedaj në profilin e tij në Fejsbuk.
Emërimi i diplomatit kontrovers për ambasador në Maqedoni shkaktoi një numër të madh reagimesh në opinionin dhe mediat kosovare, kryesisht për shkak të deklaratave ofenduese në lidhje me shtetin turk.
Deputetët e bashkësive të vogla etnike nga Grupi 6+ në Kuvendin e Kosovës kërkuan shkarkimin e Dedajt dhe kundërshtuan emërimin e tij për përfaqësues të Kosovës në Maqedoni.
Me letër të hapur kundër emërimit për ambasador u prononcua edhe kryetari i Qytetit të Mitrovicës Agim Bahtiri, të cilin Dedaj e quajti “pronar këpurdhash”, për shkak se është pronar i fabrikës për përpunim të këpurdhave. (MIA)
