Liderja e Lëvizjes për Ndryshime, Fofi Genimata përmes një interviste për televizionin grek “Alfa” ka bërë thirrje që Maqedonia tani të mos marrë ftesë për anëtarësim në NATO, por pasi të përfundojnë të gjitha obligimet e parapara në marrëveshjen.
“Unë dua, bile edhe tani, në moment të fundit, të dërgoj thirrje të mos ekzistojë tani ftesa për Shkupin. Të ketë vendim se do të ftohen me përfundimin e procesit i cili duhet të përfundojë. Por të mos jepet ftesa tani, pasi do të gjendemi para aktit të kryer. Vendi ynë nuk duhet tani t’i japë të gjithë adutët, pa mos qenë të sigurt nëse pala tjetër do të arrijë t’i përfundojë të gjitha obligimet që i kemi ndërmarrë”, ka thënë Genimata në intervistë.
Ajo konsideron se ekziston hapësirë, edhe në moment të fundit në përmirësimin e marrëveshjes së Prespës dhe ka sqaruar se partia e saj që në moment të parë ka theksuar dy punë, për të cilët nuk mund të mbështesin zgjidhjen mes Maqedonisë dhe Greqisë, njofton korrespondentja e MIA-s në Athinë.
“E para është rreziku të gjendemi para aktit të kryer lidhur me NATO-n dhe tani është moment kritik. E dyta se ekziston emër i përbërë me përcaktim gjeografik, por realisht nuk ekziston erga- omnes kur qeveria dhuron kombësi maqedonase dhe gjuhë maqedonase. Këto janë rreziqet dhe për këtë rekomandojmë. Ka hapësirë për përmirësimin e marrëveshjes. Para nesh është takimi në NATO, para nesh është revizioni i Kushtetutës në Shkup”, ka thënë Genimata për televizionin grek “Alfa”, transmeton MIA.
