Këtë javë duhet të fillojë procedura kuvendore për zgjedhjen e përbërjes së re të Komisionit Shtetëror Zgjedhor, por ende nuk dihet nëse dhe kur kryetari i Komisionit për Zgjedhje dhe Emërime, Ilija Dimovski nga VMRO-DPMNE do të caktojë seancë.
Dje ai për shumë media deklaroi se nuk do të caktojë seancë të Komisionit, i cili është kompetent për zgjedhjen e anëtarëve të KSHZ, derisa partitë nuk pajtohen dhe nuk japin dritë jeshile.
Në të kundërtën, thekson, nëse ai e fillon procedurën pa pëlqimin e dhënë nga partitë, procesi nuk do të ketë sukses dhe se do të duhet tërë procedura të niset nga fillimi, me shpallje të re, afat i ri për kandidime që do të humbej kohë shtesë.
VMRO-DPMNE para ca kohësh përmes zëdhënësit, Naum Stoillkovski tha se që të votojë për KSHZ-në, fillimisht duhet të miratohen ligji për financimin e partive dhe ligji i Qeverive, sepse sipas partisë, kjo është dakorduar që para se VMRO-DPMNE të kthehet në Parlamentin e Maqedonisë dhe të japë mbështetje për ligjet reformuese.
Për qëndrimin e tillë reagoi LSDM-ja, prej nga theksojnë se opozita me qëllim e bllokon procesin dhe e shtyn përzgjedhjen e KSHZ-së dhe çdo ditë e jep nga një kusht të ri për mbështetjen e negociatave.
Afati për formimin e Komisionit të ri Shtetëror Zgjedhor skadoi më 29 qershor. Përbërja e re do të ketë mandat gjashtëmujor dhe do të jetë e angazhuar për referendumin, të cilin kryeministri Zaev e paralajmëroi për në fund të shtatorit dhe fillim të tetorit të këtij vitit.
Kryetari i Kuvendit të Republikës së Maqedonisë, Talat Xhaferi shpreson se opozita nuk do ta bllokojë zgjedhjen e anëtarëve të Komisionit Shtetëror të Zgjedhjeve, prej çka varet edhe mbajtja e referendumit.
“Për herë të parë ndodhë që Komisionin për zgjedhje dhe emërime ta udhëheq opozita. Pas përfundimit të vitit 2016, me kompromis u morëm vesh dhe zgjatëm dorë si shumicë, të tregojmë se kemi besim tek opozita. Me gjithë premtimet e opozitës se nuk do shfrytëzohet për obstruksione ai Komision, shohim se në praktikë nuk është ashtu”, tha Xhaferi në emisionin “Uredniçki brifing” të 1TV.
Zgjedhja e KSHZ-së nuk mund të kalojë pa pëlqimin dhe votimin e opozitës, duke e pasur parasysh se nevojitet shumicë prej dy të tretave në Kuvend.
Shpallja për përbërjen e re të KSHZ-së përfundoi para dy javëve, ndërsa janë paraqitur 41 kandidatë. Afati deri kur duhet Kuvendi ta zgjedh përbërjen e re të KSHZ-së është 17 korriku.
(MIA)
