Me komedinë “Nata e dymbëdhjetë” e Shekspirit që e solli në skenë Teatri shqiptar i Metropolit, vepër me regji nga amerikani Justin Anderson u hap sipari i edicionit të 16-të të Festivalit ndërkombëtar të teatrit “Butrinti Summer Festival”.
Festivali ndërkombëtar i teatrit në Butrint, do të vazhdojë deri më 14 korrik duke sjellë disa shfaqje në skenën antike me aktorët shqiptarë, por dhe të huaj.
Këtë herë, siç transmeton ATSH-ja, vijnë trupa nga Maqedonia, Ukraina, Greqia dhe Shqipëria duke performuar vepra të autorëve të njohur botërorë por nuk mungojnë veprat e antikitetit grek.
Sonte në skenë do të vijë shfaqja performancë “Personazhet e dramës së antikitetit grek” nga regjisorët Dinos Koubatis, Pandelis Garios.
Vijon në festival dhe shfaqja “Njeriu dhe zjarri” bazuar mbi mitin e Prometeut me regji nga Dejan Projkovski nga Maqedonia, ndërsa më 12 korrik do të vijojë shfaqja “Monger” nga artistët e TOB me koreografinë e izraelitit, Barak Marshall.
Shfaqja e fundit në festival do të jetë “Kopshti i qershive” nga Anton Çekhov, që e sjell në skenë trupa e teatrit të Ukrainës me regji nga Jaroslav Fedorishin.
Festivali ndërkombëtar i teatrit “Butrintit 2000” është parë si simbol i ballafaqimit të kulturave dhe i lirisë të krijimit artistik. Ai është arenë e dramaturgjisë së mjeshtrave të mëdhenj, të cilët vijnë dhe aktualizohen prej mbartësve të një realiteti bashkëkohor.
Në edicionet e tij kanë marrë pjesë trupa teatrore nga: Italia, Franca, SHBA, Anglia, Greqia, Rusia, Kosova, Zvicra, Republika Çeke, Maqedonia, Kroacia, Serbia, Rumania, Spanja, Bullgaria, Ukraina, Holanda, Qipro, Hungaria, Suedia, Polonia e Shqipëria.
(MIA)
