Seanca të reja gjyqësore për lëndët e Prokurorisë Speciale Publike “Titanik”, “T.N.T” dhe “Trust” janë caktuar për sot në Gjykatën Penale.
Seanca e kaluar për “Titanik” ishte anuluar për shkak të mungesës së të akuzuarës Gordana Jankullovska, për shkak të shtatzënisë së rrezikshme.
Gjykatësi Osman Shabani për shkak të mospërmbushjes së kushteve për mbajtjen e seancës e ndërpreu debatin, në të cilin duhej të fillojë paraqitja e dëshmive.
Në “Titanik” të akuzuar janë ish-kryeministri Nikolla Gruevski dhe ish-funksionarët Martin Protugjer, Kiril Bozhinovski, Mile Janakieski, Gordana Jankullovska, Biljana Brishoska Boshkovski, si dhe Ilija Dimovski, Munir Pepiq, Edmond Temelko, Leko Ristoski, Kiril Todorovski, Katerina Velovska, Stanko Korunovski, Kosta Markovski, Dragçe Dragçeski, Marjan Nakevksi, Goce Janevski, Xhezmi Amet, Robert Davitkov, Dalibor Aleshkoviq dhe Lenka Rashajkovska.
Ata janë të dyshuar nga PSP-ja për shoqërim kriminel, shpelje të së drejtës votuese, lëndim të së drejtës së caktimit të votuesve, mitmarrje gjatë zgjedhjeve dhe votimit, shkatërrimin e materialit zgjedhor dhe keqpërdorim të mjeteve për financim të fushatës zgjedhore të vitit 2012.
Në bankën e të akuzuarve sot duhet të ulen edhe të akuzuarit në rastin “T.N.T.” për shembjen e kompleksit banesor-afarist “Kosmos” të biznesmenit Fiat Canoski.
Në mesin e të akuzuarve për shembjen e “Kosmos”-it janë edhe ish-kryeministri Nikolla Gruevski, ish-ministri i Transportit dhe Lidhjeve, Mile Janakieski dhe ish-kryetari i komunës së Gazi Babës, Toni Trajkovski.
Sipas aktakuzës së PSP-së, të akuzuarit në vitin 2011 kanë kryer vepër penale nga urrejtja politike me shembjen e kompleksit “Kosmos” të Fiat Canoskit.
Seanca gjyqësore sot duhet të mbahet edhe për rastin “Trust”, në të cilin të akuzuar janë biznesmeni Sead Koçan dhe dy persona fizikë dhe tre persona juridikë, në mesin e të cilëve edhe udhëheqësit e firmës “Transmet”, “Sileks” dhe “Vato” SHPKNJP, për pjesëmarrje në tenderin e Elektranave të Maqedonisë.
Sipas aktakuzës, të akuzuarit me dokumente të falsifikuara kanë kurdisur tenderë në ELEM në vlerë prej 17 milionë eurove.
Lënda, siç publikoi PSP-ja, është formuar në bazë të tre bisedave të përgjuara, nga të cilat dy të papublikuara në opinion nga 3.8.2011 dhe 6.10.2011.
(MIA)
