Presidenti Hashim Thaçi synon t’i bëjë bashkë kryeministrin Ramush Haradinaj, kryeparlamentarin Kadri Veseli, si dhe liderët e partive të tjera politike për ta formuar ekipin negociator për dialogun me Serbinë, por partitë politike vazhdojnë ta konsiderojnë Thaçin të papranueshëm si negociator me Beogradin, publikoi sot gazeta “Zëri”.
Siç raportoi korrespondenti i MIA-s nga Prishtina, Thaçi ka paralajmëruar se në fillim të kësaj jave do t’i takojë liderët institucionalë dhe ata partiakë për ta themeluar ekipin negociator të Kosovës, ekipin strategjik dhe komisione të tjera për dialogun me Serbinë.
Megjithatë, partitë politike shprehen të rezervuara rreth kësaj çështjeje.
Përveç partive opozitare, i pari i Kosovës nuk e ka as mbështetjen e partnerit të koalicionit, të Nismës Socialdemokrate, shkruan më tutje “Zëri”.
Ndërkohë që përfaqësues të shoqërisë civile thonë se arritja e konsensusit dhe ndërtimi i një platforme për dialogun është i domosdoshëm për vazhdimin e fazës finale, në të cilën pritet që të arrihet marrëveshje përfundimtare midis Prishtinës dhe Beogradit, shkruan gazeta prishtinase.
(MIA)
