Kreu i Partisë Demokratike, Lulzim Basha me një mesazh në Facebook ka përshëndetur marrëveshjen mes Maqedonisë dhe Greqisë për çështjen e emrit.
Basha në reagimin e tij shkruan se marrëveshja është një akt pjekurie politke që u jep meritë dy qeverive dhe që do ta ndihmojë Maqedoninë të bëhet pjesë e NATO.
“Personalisht dhe ne emër të Partise Demokratike përshëndes marrëveshjen midis kryeministrave Cipras dhe Zaev, lidhur me emrin e fqinjit tone lindor, nga sot Maqedonia Veriore”, shkruan Basha në Facebook.
Ai thekson se kjo marrëveshje si akt i pjekurisë politike u jep meritë dy qeverive dhe faktorëve politikë vendas dhe ndërkombetare që i mbështetën duke përmbyllur në këtë mënyrë një temë te zgjatur kontesti në rajon.
Personalisht dhe në emër të Partisë Demokratike duke uruar finalizimin me sukses të kësaj marrëveshje për zgjidhjen e pengesës së fundit, shpreh besim në përmbylljen sa me parë të anëtarësimit në NATO të Maqedonisë Veriore, dhe më tej për udhëtimin së bashku drejt procesit plot sfida dhe shpresë të integrimit në BE të dy vendeve tona”, shprehet Basha.
Paraprakisht marrëveshjen e përshëndeti edhe kreu shtetëror shqiptar, duke e vlerësuar si historike. (MIA)
