Zëdhënësi i Lëvizjes BESA të krahut të Kasamit, Abdush Demiri sot përmes një konference me gazetarët ka theksuar se Gjykata e Apelit ka hedhur poshtë vendimin e gjykatës themelore Shkupi 1, me ç’rast tanimë e konteston Kasamin si kryetar partie.
“Sot kemi pranuar nga Gjykata e Apelit-Shkup një vendim skandaloz, i cili nuk ka asnjë përmbajtje juridike, që dëshmon se gjyqësia është akoma e kapur nga pushteti dhe vendimet e saj i sjell përmes imponimeve nga partitë në pushtet. Fakti që Gjykata e Apelit ka pranuar dëshmi të falsifikuara, që nuk janë paraqitur në shkallën e parë, dhe ka pranuar dokumentacion me vulë që Lëvizja Besa e ka shpallur të pavlefshme, dëshmon se ky proces tashmë shëndrohet në proces të pastër politik. Pyesim publikisht gjykatësit e Apelit, se çka i shtyri që të marrin një vendim kaq skandaloz në ditën kur votohet Qeveria? A është pikërisht pjesmarrja në Qeveri e personave të caktuar që ndikoj në vendimin e tyre i cili mund të quhet gjithçka por jo vendim i drejtë dhe ligjor.”, theksoi Demiri.
Ai tha se publikisht e pyesin kryeministrin Zoran Zaev, se a duhet që gjithë politikanët të jenë të dëgjueshëm dhe servil ndaj pushtetit që gjykata e Apelit të marrë vendime pro tyre!?
“Pasi që ne jemi të bindur se jemi në rrugën e drejtë dhe përveç legjitimitetit nga strukturat edhe aspektin legal e kemi të pastër si kristali në favorin tonë, rikujtojmë pushtetin se nëse ndodh precedent që Gjykata të fshije një kryetar partie vetëm se person i pa autorizuar ka bërë një kërkesë të tillë atëhere do inkurajojmë të gjithë të shkojnë në gjykata dhe të kërkojnë të shkruhen si kryetar të LSDM-së pasi që një praktikë e tillë po vendoset nga pushteti që udhëheq LSDM. Edhe përkundër këtij vendimi skandaloz, rikujtojmë se Lëvizja Besa jemi ne dhe se personi i vetëm i autorizuar në gjykatë është kryetari Bilall Kasami, dhe çdokush që do tentojë që të anashkalojë këtë fakt do përballet deri në fund me procedurat e nevojshme para organeve të drejtësisë. Poashtu njoftojmë se prej sot kemi nisur edhe procedura juridike për disa persona që janë nënshkruar në emër të Lëvizjes Besa dhe kanë falsifikuar vulën e partisë.”, theksoi zëdhënësi i Kasamit.
Burimi: INA
