Nën moton “Policia për qytetarët”, MPB-ja e filloi manifestimin e 7 Majit – Ditës së Policisë së Maqedonisë me një stërvitje taktike-demonstruese e pjesëtarëve të Njësitit për detyra speciale i cili në tri situata të ndryshme demonstroi aftësi taktiko-teknike në kazermën “Gjorçe Petrov”.
Ministri i Punëve të Brendshme, Oliver Spasovski theksoi se kjo stërvitje taktiko-demonstruese është një prej mënyrave si të afrohet policia deri te qytetarët e Maqedonisë.
“Lidhja midis qytetarëve dhe policisë së Maqedonisë duhet të përforcohet dhe të ripërtërihet që të gjithë të jemi më të sigurt dhe të përfshirë në sistemin e sigurisë”, tha Spasovski.
Studentët nga Fakulteti i Sigurisë, Instituti për Mbrojtje dhe Paqe, nga Qendra e Trajnimit, kryetarë të komunave, ministra … në poligonin para kazermës patën rastin të shohin gatishmërinë e njësive më elite për detyra të veçanta të cilat demonstruan ballafaqim me turmë e cila e shkel rendin dhe qetësinë publike, si dhe ndalimin dhe zbulimin e një automjeti në lëvizje me personat e armatosur.
Duke iu përgjigjur pyetjes së gazetarëve lidhur me pagesën e pagës së 13-të ndaj punonjësve të policisë, ministri Spasovski tha se është duke u punuar në përpunimin e të dhënave që të përcaktohet numri i saktë i personave që i plotësojnë kushtet për më shumë se 150 orë dhe se në vazhdimësi punohet për plotësimin e vendeve ku ka mungesë të kuadrove policore që të mos paraqitet problem me angazhimin shtesë të të punësuarve në MPB.
Ministri u pyet edhe nëse do të ftojë dikë nga ish-ministrat dhe drejtorët e qeverisë së mëparshme për ta shënuar Ditën e Policisë, me ç’rast u përgjigj se ai do të ishte i kënaqur që një pjesë e strukturave të mëparshme të cilët kanë bërë mirë për policinë e Maqedonisë të marrin pjesë në manifestimet. Sipas Spasovskit, janë edhe një pjesë e ish-funksionarëve që do të ndihen të mirë nëse marrin pjesë në sistemin në të cilin kontribuuan të rrëzohen. (MIA)
