Pas darkës së mbrëmshme të punës e cila, sipas mediave greke, ka kaluar në klimë të ngrohtë dhe miqësore, shefat e diplomacive të Maqedonisë Nikolla Dimitrov, të Greqisë Nikos Koxias, të Bullgarisë Ekaterina Zaharieva dhe të Shqipërisë Ditmir Bushati sot në Selanik e fillojnë pjesën formale të takimit ministror katërpalësh në fokusin e së cilit janë mundësitë për përforcim të bashkëpunimit të ndërsjellë.
Mbrëmja e punës ishte në organizim të nikoqirit, shefit të diplomacisë greke Nikos Koxias, ndërsa fotografi në profilet zyrtare në Tuiter publikuan edhe MPJ-ja e Maqedonisë dhe Greqisë.
Siç njoftoi korrespondenti i MIA-s nga Athina, në kornizat e takimit ministror, shefat e diplomacisë së Maqedonisë dhe Greqisë do të mbajnë takim bilateral.
Mbledhja e tretë ministrore fillon në orën 10 sipas kohës lokale me fjalim të Koxias i cili do ta hap pjesën e punës.
Shefave të diplomacive të katër vendeve do t’u bashkëngjiten edhe ministrat e Transportit dhe Punëve të Brendshme. Do të bisedohet për bashkëpunimin tejkufitar, për europerspektivat e Ballkanit Perëndimor, për ndikimin e ngjarjeve të Lindjes së Afërt mbi rajonin, për mundësitë e zhvillimit të infrastrukturës së komunikacionit. Do të bisedohet edhe për bashkëpunimin mes policëve, luftën kundër krimit të organizuar dhe atë tejkufitar dhe ballafaqimin me emigracionin.
Mbledhja ministrore do të përfundojë pasdite me konferencë të përbashkët për shtyp. (MIA)
