Qeveria e Republikës së Maqedonisë mbrëmë e mori besimin nga deputetët. Dyzetë vota “për” jobesim të Qeverisë ishin nga opozita, 62 deputetë nga shumica qeveritare votuan “kundër” jobesimit, ndërsa “abstenim” ishin dy deputetët e Lëvizjes BESA dhe Aleancës për Shqiptarët.
Debatin prej 12 orëve për interpelancë, e inicioi VMRO-DPMNE-ja e cila për këtë seancë e ndërpreu bojkotin dhe u kthye në Parlament.
Kryeministri Zoran Zaev në fjalimin para deputetëve tha se me kujdes e ka ndjekur seancën e djeshme për të dëgjuar vërejtje por, tha, nuk ka dëgjuar argumente.
Theksoi se Qeveria ka trashëguar kolaps total, borxh prej 180 milionë eurove, pasoja nga qeverisja të cilat ishin kërcënime sipas sistemit të institucioneve.
“Ishim të ballafaquar me domosdoshmërinë për reformat themelore dhe transformimit, rehabilitimit të shoqërisë dhe shtetit dhe për këtë është e nevojshme kohë dhe përfshirje e të gjithë faktorëve politik. Sistemi duhet të rigjenerohet prej brenda, nuk mund të ndodhë nga jashtë”, porositi Zaev.
Apeloi në përfshirje dhe konstruktivitet në zbatimin e reformave që Republika e Maqedonisë të jetë anëtare e NATO-s dhe BE-së, me jetë dinjitoze për të gjithë qytetarët dhe të jetë një shoqëri për të gjithë.
Burimi: MIA
