Ministri i Ekonomisë së Republikës së Maqedonisë, Kreshnik Bekteshi, me ftesë të ministrit të Ekonomisë të Emirateve të Bashkuara Arabe Sulltan bin Said Al Mansuri nga 9 deri më 11 prill, merr pjesë në edicionin e tetë të Samitit Vjetor të Investimeve në Dubai, Emiratet e Bashkuara Arabe, që mbahet nën patronazhin e Madhërisë së Tij Sheik, Mohamed Bin Rashid Al Maktum, nënkryetar i Emirateve të Bashkuara Arabe dhe kryeministër i Dubait.
Ministria e Ekonomisë sot kumtoi se bëhet fjalë për një tubim vjetor, i cili paraqet platformë udhëheqëse globale për investimet e huaja, ndërsa këtë vit temë e takimit është “Lidhja e Tregjeve të Zhvilluara dhe të Reja, përmes Investimeve të Huaja Direkte – Partneritet për rritje gjithpërfshirëse dhe zhvillim të qëndrueshëm”, që mbledh së bashku disa dhjetëra mijëra pjesëmarrës nga sektori publik dhe privat nga mbi 100 shtete, duke përfshirë ministra të ekonomisë, shkencëtarë, odat ekonomike, zonat industriale dhe ekonomike, bankat dhe institucionet financiare, si dhe ndërmarrjet e vogla dhe të mesme.
Ministri Bekteshi, në kuadër të axhendës së ngjeshur, prezantoi mundësitë për investim në vend dhe situatën ekonomike të vendit, me çrast realizoi takime të shumta me investitorët e interesuar.
Gjatë vizitës, Bekteshi u takua me sipërmarrësin e njohur Sheti, i cili është një nga biznesmenët më të suksesshëm në nivel global dhe është një nga njerëzit më të pasur në Emiratet e Bashkuara, ku vepron me shumë kompani dhe fabrika në sektorë të ndryshëm, kryesisht në industrinë farmaceutike, ndërsa është pronar i fabrikës globale NEOPHARMA si dhe spitalet private më të njohura në Emiratet e Bashkuara Arabe, “NMC spitalet”, “Traveleks”, “UAE Exchange”, “Royal”, dhe të tjera.
Gjatë takimit, Sheti shprehu interes në periudhën e ardhshme të viziton Maqedoninë për tu informuar me mundësitë dhe planet për investime në vendin tonë.
Gjatë ditës së sotme, në axhendën e ministrit Bekteshi, ka disa takime zyrtare me përfaqësuesit e Qeverisë së Emirateve të Bashkuara Arabe, para të cilëve do të paraqet mundësitë dhe politikat për tërheqjen e investimeve, si dhe mundësitë për forcimin e bashkëpunimit ekonomik, i cili nga aspekti i tregtisë, në pjesën e shkëmbimit tregtar mund të jetë shumë më i kënaqshëm.
Burimi: MIA
