Filmi “The Shape of Water”, në regji të regjisorit meksikan Gilermo del Toro është shpërblyer me Oskar për filmin më të mirë, në ceremoninë që sonte u mbajt në Teatrin Dolbi në Los-Anxhelos. Del Toro e fitoi çmimin edhe për regjisor më të mirë. “The Shape of Water” ishte i nominuar në 13 kategori, ndërsa çmime fitoi vetëm për katër.
“Për këtë moment kam ëndërruar si djalosh në Meksikë. Oskarin ua kushtoj të gjithë regjisorëve të rinj në gjithë botën të cilët kanë për qëllim të xhirojnë filma, ashtu siç dëshirojnë”, deklaroi regjisori meksikan dhe shtoi se si shumë të tjerë, është emigrant në Amerikë.
Ai theksoi se SHBA-ja është shtëpia e tij në “çdo kuptim të fjalës”.
Oskar si aktori më i mirë fitoi Geri Oldman për rolin në filmin “Darkest Hour”, në të cilin në mënyrë maestrale e ringjalli Uinston Çerçilin.
“Do të doja t’i falënderohem nënës time e cila ka 99 vjeç dhe e cila është më e vjetër se Oskari. Nënë, vendos ujë për çaj, po vij, do të sjell Oskar”, deklaroi Oldman dhe iu falënderua Uinston Çerçilit, i cili “i ka bërë shoqëri” derisa e ka krijuar rolin.
Frensis Mekdermond fitoi oskar si aktorja më e mirë për rolin kryesor femëror në filmin Three Billboards Outside Ebbing, Missouri”. Ajo u bëri thirrje të gjithë femrave në sallë që të ngrihen…”Jemi prezente shumë në industrinë e filmit në Amerikë. Është e rëndësishme të flasim mes vete, sepse kemi gjithçka t’i ofrojmë kësaj industrie”, theksoi Mekdermond.
Oskar për film jashtë rajonit anglisht-folës fitoi Kili, në realizimin e Sebastian Lejl, “A Fantastic Woman”. Në këtë film rolin kryesor e luan një person transgjinor.
Një prej befasive më të mëdha në ndarjen e Oskarëve ndodhi në kategorinë film dokumentar. Oskar fitoi “Icarus” në të cilin flitet për gjoja dopingun e sportistëve në Rusi. Ylli i basketbollit Kobi Brajant u shpërblye për filmin e shkurtër të animuar “Dear basketball”.
Burimi: MIA
Përmbajtjet që i merr Civili nga burime tjera nuk i nënshtrohen licencës Creative Commons 1.0, e cila përndryshe është e zakonshme, për përmbajtjet të cilat i plason kjo platformë mediatike. Ju lutemi, konsultohuni me buruesit për marrje të përmbajtjeve të tilla.
