Qeveria ka përgatitur Propozim- ligj për ndërprerjen e Ligjit për Artist kombëtar. Nëse propozimi, për të cilin mblidhen mendime para se të shtrohet në procedurë parlamentare, votohet në Kuvend, titulli “Artist Kombëtar” nuk do t’u jipet “artistëve të Maqedonisë të cilët kanë kontribuar për ndërtimin dhe avancimin e kulturës dh artit në Maqedoni ose përmes punës së tyre e kanë afirmuar veprimtarinë jashtë vendit”.
“Ligji aktual krijon trajtim të pabarabartë mes artistëve kombëtarë dhe të punësuarve tjerë në kulturë, të cilët kanë të ardhura më të vogla nga rroga mesatare në vend. Mirëpo, ajo që vërehet është se me ligjin mundësohet që artistët aktivë të fitojnë të drejtën – deri në fund të jetës të realizojnë kompensim prej dy rrogave mesatare mujore, pavarësisht nga ajo që kanë të ardhura të rregullta, ose honorare nga projekte të realizuara”, informojnë për mediat nga Ministria e Kulturës.
Artistët kombëtarë të cilët nga viti 2011, prej kur ndahet titulli, veç më e kanë fituar këtë të drejtë, pianisti Simon Tërpçeski, regjisori Millço Mançevski, operistët Boris Trajanov dhe Ana Durllovski dhe Nikolla Maxhirov, do të vazhdojnë ta realizojnë dhe përjetësisht do të pranojnë pagesë mujore prej 60.000 denarë. Këngëtarja Esma Rexhepova, e cila është një nga bartëset e titullit, ka vdekur në vitin 2016.
