“Pas krizës e cila kulminoi me dhunë kundër deputetëve të shumicës së re parlamentare, Maqedonisë i duhet paqe, pajtim dhe marrëveshje për bashkëpunim gjatë formulimit të politikës e cila do ta dërgon Maqedoninë në BE”, porositi eurodeputeti Ivo Vajgëll, pas takimit me presidentin e ri të parlamentit, Talat Xhaferin.
Dy anëtarë të treshit ndërmjetësues nga Parlamenti Europian, i përshëndetën partitë e koalicionit të ri që nuk nxitën demonstrata në rrugë, të cilat kanë mundur ta shndërrojnë Maqedoninl në skenë të ndeshjeve masovike politike ose etnikisht të motivuara, lajmëroi Vajgëll.
Takimi i Xhaferit me Vajgëll u mbajt në kornizat e vizitës së tij të parë zyrtare në Bruksel, pasi u zgjedh si njeriu i parë i parlamentit të Maqedonisë.
Xhaferi u takua edhe me përfaqësuesen e lartë të BE për politikë të jashtme dhe siguri, Federika Mogerini. Në kumtesën nga kabineti i saj, të publikuar pas takimit, thuhet: “Ajo e përshëndeti zgjedhjen e Talat Xhaferit për President të Kuvendit nga shumica parlamentare, duke theksuar se ky është roli që duhet të jetë mbi politikat partiake dhe ndëretnike, dhe të punojë në interesin e të gjithë qytetarëve dhe bashkësive. Bashkimi Evropian është i përgatitur të bashkëpunojë me atë, me Kuvendin dhe me të gjitha institucionet tjera për zbatimin e prioriteteve urgjente reformiste, si dhe për implementimin e Marrëveshjes së Përzhinës”.
Mogerini theksoi se BE pret të gjitha partitë politike të angazhohen në mënyrë konstruktive në procesin politik, duke e përfshirë edhe formimin e qeverisë, si dhe në punën e Kuvendit të ri.
Xhaferi u takua edhe me eurokomisarin për zgjerim, Johanes Han.
“Shefi i shtetit duhet të nxjerr mësim nga dhuna, kur do ta sjell vendimin për dorëzimin e mandatit për krijimin e Qeverisë së re”, apeloi Xhaferi nga Brukseli, menjëherë pas takimit me Han, i cili apeloi që parlamenti të punojë pa pengesa, ndërsa të gjithë deputetët, duke e përfshirë edhe opozitën, të jenë konstruktiv.
Eurokomisari Han paraprakisht, në drejtimin e ti në mbledhjen e Komitetit të përbashkët parlamentar BE – Maqedoni, që u thirr me iniciativë nga eurodeputeti Slloven, Allojz Peterle, ka theksuar se është e qartë se disa njerëz e kanë rëndë të kalojnë nga pushteti në opozitë.
“Ajo që pamë javën e kaluar, është diçka që unë, sinqerisht, nuk e pritja. Kjo është e pamundur, por qartë se çdo gjë mund të bëhet e mundur. Kjo dhunë në parlament është absolutisht e papranueshme!”, deklaroi Han.
Ai ka shtuar se pret hetim të plotë të ngjarjeve me pasoja juridike, dhe ka përkujtuar se institucionet e obliguara për zbatimin e ligjeve, ka kohë që nuk e kryejnë punën e tyre.
