Prokuroria Speciale Publike heq dorë nga akt-akuza për rastin “Puç”. Prokuroria ka paralajmëruar se gjatë ditës do ta dorëzojë paraqitjen deri te Gjykata Themelore –Shkup 2.
“Prokuroria heq dorë nga akt-akuza, sepse gjendja faktike e paraqitur në aktin e akuzës është në kundërshtim me dëshmitë të cilat kjo Prokurori i ka në dispozitë, dhe me gjetjet në procedurat hetuese: “Target” dhe “Fortesa”. Ky vendim i yni ka për qëllim përmbledhjen e dëshmive plotësuese të cilat në tërësi do ta sqarojnë gjendjen faktike dhe do ta mundësojnë sjelljen e vendimit të drejtë dhe ligjor të Prokurorisë Publike”, lajmërojnë nga PSP.
Nga Prokuroria udhëzojnë se me tërheqjen nga akt-akuza në rastin “Puç”, nuk paragjykojnë se dikush është i pafajshëm ose fajtor, por se vetëm vlerësojnë, se për vërtetim të plotë dhe të saktë të gjendjes faktike, janë të nevojshme dëshmi plotësuese, të cilat nuk mund të sigurohen në fazën e dëgjimit kryesor.
Në rastin “Puç”janë të akuzuar lideri i LSDM, Zoran Zaev, shefi i mëparshëm i DSK, Zoran Verushevski, bashkëshortja e tij Sonja Verushevska dhe i punësuari në Komunën e Strumicës, Branko Palifrov. Të gjithë dyshohen për përgjim të paautorizuar, spiunim dhe dhunë ndaj përfaqësuesve të organeve më të larta shtetërore. Dëgjimet e deritanishme për rastin “Puç” kaluan me disa prolongime, kështu që ende nuk ka filluar dëgjimi kryesor.
