Rënie për një vend në renditjen e Reporterëve pa Kufij ka shënuar liria e medias në Maqedoni. Nga 180 vendet të radhitura në listën për lirinë e shtypit, Maqedonia renditet në vendin 118.
Në vitin 2015, liria e medias në Maqedoni ishte e renditur në një vend më lart, respektivisht në vendin 117.
“Shpifja është hequr nga Kodi Penal në vitin 2012, por akuzat u zëvendësuan me procedura civile, me mundësi për gjoba të mëdha dhe dënime me burg për gazetarët dhe pronarët e mediave”, thuhet në arsyet për shkak të cilave Maqedonia është në vendin e 118-të. Ajo që është më shqetësuese është numri i padive për shpifje.
“Të paktën 580 padi për shpifje janë ngritur nga fundi i vitit 2014 deri më tani, disa dhjetëra prej tyre kundër gazetarëve. Si rezultat I kësaj, sipas një sondazhi të Sindikatës të gazetarëve dhe punëtorëve mediatikë të Maqedonisë, më shumë se gjysma e gazetarëve në Maqedoni thonë se censurohen”, është theksuar në raportin e fundit mbi lirinë e mediave në vitin 2015.
E para në këtë renditje është Finlanda, para Holandës, Norvegjisë, Danimarkës dhe Zelandës së Re. Të renditur më poshtë se Maqedonia në këtë vit janë Kina, Siria, Turkmenistani, Koreja e Veriut dhe Eritrea, e cila është e fundit në listë.
Të gjitha vendet e rajonit janë renditur më mirë në krahasim me Maqedoninë. Shqipëria është në pozitën 82, Mali i Zi në vendin e 106, Bullgaria në 113tin, Greqia këtë vit është në vendi e 89, Bosnja dhe Hercegovina 68, Kroacia është në vendin e 63të, ndërsa Serbia këtë vit gjendet në vendin e 59të.
