Ekipit të Prokurorisë Publike Speciale (PPS) iu dhanë disa kallëzime penale për një kohë të shkurtër. Ky institucion i ri u themelua si pjesë e Marrëveshjes së Përzhinës për tejkalimin e krizës politike në vend, por nga çasti i parë është objekt obstruksionesh dhe sulmesh të orkestruara të mediumeve.
“Prokuroria Publike Speciale i hedh si të pabaza të gjitha akuzat prej kallëzimeve penale” – deklaroi Lençe Ristoska për CIVIL-in. “Pohojmë se prej anës sonë është vepruar në kuadër të kompetencave të cilat janë paraparë me ligj.”
Pyetëm se si ndikon atmosfera e plotë dhe akuzat ndaj punës së këtij institucioni. “Marrë në përgjithësi, nuk ka ndonjë ndikim të madh, sepse ne po e bëjmë punën tonë. Mirëpo, njëmend se deri dikund ndikon në kuptim të asaj se po humbet kohë në vend se të drejtohem ekskluzivisht në punën time si prokurore – kam shumë angazhime lidhur me demantimin e sqarimin e disa situatave. Kjo ka njëfarë segmenti edhe të shpërqendrimit, por nuk do të thosha se ka ndikim drastik. Ne do të vazhdojmë me punë.”
Sipas Ristoskës, edhe deri më tani në praktikën e prokurorëve ka pasur shumë raste të parashtrimit të kallëzimeve penale kundër prokurorësh prej palësh të pakënaqura në procedura. “Ky nuk është presedan dhe nuk është diç e panjohur për ne.” – thotë Ristoska. “Më e rëndësishmja është se e gjithë puna jonë është në përputhje me ligjin dhe në asnjë moment nuk janë shkelur kompetencat ligjore nga prokurorët.”
