Parlamenti rus (duma) dje e miratoi ligjin me të cilin autorizohen prokurorët të mbyllin mediat e huaja në Moskë, nëse janë mediume nga ndonjë vend “armiqësor” ndaj mediave ruse, prejse disa mediave shtetërore ruse u ishte ndaluar të veprojnë në vendet e Perëndimit, transmeton MIA.
Propozim-ligji, i miratuar në lexim të parë nga Duma, dhoma e poshtme e Parlamentit rus, gjithashtu ndalon shpërndarjen e materialit mediatik që është konfiskuar nga prokuroria. Ligji duhet të kalojë edhe dy lexime dhe duhet të miratohet nga Dhoma e Epërme e parlamentit dhe të nënshkruhet nga presidenti Vlladimir Putin, publikoi Hina.
Në situatën aktuale gjeopolitike, mediat u bënë instrument për ndikim mbi gjendjen informative në shoqëri”, thonë deputetët në arsyetimin e ligjit. Ligji ishte propozuar nga njerëzit me ndikim, ndërmjet të cilëve edhe Andrej Lugovoj, i cili ishte akuzuar në mungesë nga prokurorët britanik në vitin 2006 për helmim të ish spiunit rus Aleksandar Litvinenko. Lugavoj, ish anëtar i KGB-së i mohon akuzat.
Ministri rus i Punëve të Jashtme Sergej Lavrov gjatë gjithë kohës e kritikonte Perëndimin për shkak të ndalesës për emitimin e mediave ruse Sputnik dhe RT.
Presidenti rus Vlladimir Putin në mars e firmosi ligjin me të cilin shqiptohen dënimet me burg deri në 15 vjet për personat të cilët qëllimisht përhapin “informata” për forcat e armatosura ruse.
Si rezultat, disa media perëndimore tërhoqën gazetarët e tyre nga Rusia, por disa, përfshirë edhe Reutersin, mbetën në vend.
