Bashkimi Evropian e shpreh mbështetjen e vet për mbrojtësit e të drejtave të njeriut, forcave demokratike, mediumeve të lira dhe shoqërisë së pavarur qytetare në Rusi dhe i bën thirrje Rusisë shpejtë t’i kthehet respektimit të të drejtave njerëzore, të drejtës ndërkombëtare dhe të drejtës humanitare ndërkombëtare, deklaroi sot përfaqësuesi i lartë i BE-së për politikë të jashtme dhe siguri, Zhozep Borel, njofton agjencia e lajmeve MIA.
Në deklaratën për vendimin e Komitetit të ministrave të Këshillit të Evropës (KE) për ta përjashtuar Rusinë nga anëtarësimi në matë organizatë, Borel thotë se me agresion të paarsyeshëm ndaj Ukrainës, vend tjetër anëtar i KE-së, Rusia i shkeli parimet themelore të Statutit të Këshillit të Evropës, kartës së KB-së dhe të drejtës ndërkombëtare.
Ai shprehi keqardhje që Rusia nuk i ka dëgjuar thirrjet që menjëherë dhe pa kushte t’i ndërpresë operacionet e veta ushtarake në Ukrainë.
“Për shkak të sjelljes së Rusisë, qytetarët rusë tashmë nuk do të kenë dobi nga mbrojtja e paraparë me Konventën evropiane për të drejta të njeriut, as nuk do të mund të parashtrojnë raste për shkelje të të drejtave të njeriut në Gjykatën evropiane për të drejta të njeriut, që është edhe një kufizim i të drejtave të qytetarëve rusë”, thotë Borel në deklaratën me rastin e përjashtimit të Rusisë nga Këshilli i Evropës.
