Autostradat Gostivar – Kërçovë dhe Shkup – Bllacë dhe rruga Kriva Pallankë deri në kufirin me Bullgarinë, janë projektet e ardhshme të cilat do të jenë në fokus të bashkëpunimit me Bankën Evropiane për Rindërtim dhe Zhvillim (BERZH), theksoi ministri i Financave, Dragan Tevdovski, i cili merr pjesë në Takimet vjetore të BERZH-it, që po mbahen në Jordani.
BERZH-i është i interesuar për financimin e këtyre projekteve dhe ka mundësi për ndarjen e grant mjeteve për kryerjen e një pjese të punëve ndërtimore për autostradën Gostivar-Kërçovë, për çka u bë fjalë në takimet. Granti do të jetë për një pjesë të ndërtimit të pjesës së parë të autostradës, gjegjësisht pjesës Bojkoçan – Kërçovë në gjatësi prej 12 kilometrave. Priten edhe grant mjete edhe për rikonstruimin e rrugës Kriva Pallnkë – Deve Bair.
“Për autostradën Shkup-Bllacë tani më kemi marrë grant nga BERZH-i për kompletimin e detyrës projektuese, e cila duhet të jetë gati për më pak se tre muaj”, theksoi Tevdovski.
Siç theksoi, pjesa më e madhe e bashkëpunimit të Maqedonisë me BERZH-in është në sektorin e transportit. Në pjesën e infrastrukturës hekurudhore në takimet u fol për rikonstruimin e hekurudhës Shkup – Kërçovë.
“Nga infrastruktura hekurudhore, i rëndësishëm është Korridori 8 – para së gjithash projekte të ardhshme Shkup – Kërçovë. I rëndësishëm është edhe projekti për sisteme elektronike përgjatë Korridori 10 dhe projekti për ndërtimin e stacionit kufitar në Korridorin 10 të hekurudhës, midis Republikës së Maqedonisë dhe Republikës së Serbisë”, tha Tevdovski.
Ai theksoi edhe se takimet vjetore të BERZH-it janë një mundësi e shkëlqyer që të flitet për projektet e mëdha kapitale, sepse në to marrin pjesë njerëz të rëndësishëm të sektorit financiar.
“BERZH-i është partner serioz i Maqedonisë. Portofoli i tyre vijues i projekteve arrin 707 milionë euro. Pjesa më e madhe e projekteve janë nga sektori i transportit, në infrastrukturën rrugore, ku BERZH-i mori pjesë në konstruksionin financiar të rrugës Demir Kapi-Smokvicë, në rrugën ekspres Shtip – Radovish, remont të hekurudhës në Korridorin 10 dhe rehabilitim të hekurudhës në Korridorin 8”, tha Tevdovski.
Përveç takimeve bilaterale me përfaqësues të lartë të BERZH-it, ministri Tevdovski do të marrë pjesë edhe në Tryezën e rrumbullakët të Bordit të guvernatorëve dhe në panelin “Infrastruktura e gjelbër”. (MIA)
