Ministria për Punë të Jashtme, përmes Ambasadës së Maqedonisë në Uashington, ka kërkuar qëndrim nga Stejt Departamenti i SHBA për deklaratat e kongresmenit Amerikan Dana Rohrbaker, të dhëna në intervistën për “Vizion Plus” nga Tirana.
Në lajmërimin e MPJ thuhet që kongresmeni është anëtar i Komitetit për Punë të Jashtme dhe President i Nën-komitetit për Punë Evropiane të Shtëpisë Përfaqësuese, dhe sipas kësaj, deklaratat e tij shkaktojnë shqetësim të madh në vendin dhe rajonin. Gjithashtu, MPJ paralajmëron se deklaratat e këtilla e përhapin retorikën nacionaliste te fqinjët.
“Besojmë se Stejt Departamenti do të mënjanojë çdo dilemë rreth pozitave të paraqitura, si dhe do ta afirmojë politikën e vet ndaj Maqedonisë dhe Ballkanit”, thuhet në lajmërimin e MPJ.
Në intervistën, kongresmeni Rohrbaker thotë se qëndrimi i tij është se Maqedonia nuk është shtet, dhe se popujt në Maqedoni janë aq të ndarë sa që, sipas tij, më mirë do të ishte që Shqiptarët të jenë pjesë e Kosovës, ndërsa pjesa tjetër e Maqedonisë të bëhet pjesë e Bullgarisë, ose cilit do shtet tjetër!?
Në pyetjen nëse administrata e Presidentit të SHBA, Donald Tramp, e mbështet këtë ide, kongresmeni u përgjigj: “Unë kam ndikim mbi politikanët Amerikanë. Unë jam president i Komitetit për Punë të Jashtme të Shtëpisë Përfaqësuese e cila merret me atë pjesë të botës. Do të kemi seanca në muajt e ardhshëm. Një nga pyetjet për të cilat do të diskutojmë, është ndryshimi i kufijve, me qëllim që ato të kenë kuptim dhe të sjellin paqe në Ballkan”.
