CIVIL – Qendra për Liri ua uron ditën e Një Majit të gjithë punëtoreve dhe punëtorëve të Republikës së Maqedonisë dhe në botë dhe u bën thirrje për solidaritet dhe luftë për të drejtat e punëtorëve. Pa të drejtat e punës, nuk ka as të drejta dhe liri të njeriut.
Shumë gjëra kanë ndryshuar në Republikën e Maqedonisë, që nga Një Maji i kaluar (2015) deri sot.
Peizazhi politik në vend është i mbushur me kufomat e miteve dhe kulteve të vdekur dhe po zhvillohen hetime për krime të rënda dhe për abuzimet e pushtetmbajtësve. Qytetaret dhe qytetarët dolën në rrugë dhe ende janë atje – kërkojnë drejtësi, liri, demokraci, respektimin e të drejtave të njeriut.
Ajo që nuk mund të imagjinohej dy vjet më parë, është bërë përditshmëri.
Nuk kanë ndryshuar të paktën tre gjëra: varfëria, shkelja e të drejtave të punëtorëve dhe roli i turpshëm i sindikatave në vend.
Pozita sociale e punëtorëve dhe të drejtave të tyre të punës dhe të drejtave sociale është në nivelin më të ulët në 15 vitet e fundit.
Përditë, qytetaret dhe qytetarët e Maqedonisë përballen me një sfidë të vetme – si të mbijetojnë.
Pjesa më e madhe e punëdhënësve në vend u paguajnë punëtorëve kompensime mizore për punën e vështirë, e duke mos u siguruar gjatë kësaj as kushtet minimale për punë dhe duke i trajtuar punëtorët nën nivelin e dinjitetit njerëzor.
Shteti, më saktësisht pushteti, paraqitet si punëdhënësi më i madh në vend, por as prej së largu nuk i respekton të drejtat e punëtorëve. Pushteti përdor punësimin si një mjet, me të cilin zbaton korrupsion politik, si dhe represion sistematik politik dhe diskriminim mbi pjesën tjetër të popullatës.
Vetë punonjësit e administratës janë objekt i presionit politik, shantazheve dhe kërcënimeve, në mënyrë që të detyrohen që të jenë të bindur ndaj partisë, pavarësisht nëse ata e bëjnë mirë punën e tyre apo jo. Edhe të drejtat e tyre të punës janë shkelur vrazhdë.
CIVIL me vite punon intensivisht në tema që lidhen me të drejtat e punës dhe të drejtësisë sociale dhe ka në dispozicion një sërë të të dhënave dhe dëshmive në lidhje me situatën e keqe në këto sfera.
Gjendja me të drejtat dhe liritë e njeriut, të drejtat sociale, shkallën e varfërisë, mosfunksionimin e sindikatave që duhet të mbrojnë të drejtat e punëtorëve, manipulimin e statistikave, migrimin, varfërinë, pasigurinë, kushtet e punës, sigurinë në punë, shëndetin, arsimin dhe mundësitë për kualifikim plotësues apo rikualifikim – janë vetëm një pjesë e të gjitha vështirësive, me të cilat përballen punonjësit në Maqedoni.
