Në qendër të Prilepit, në më tepër lokacione, këtyre ditëve mundeshin të shihen fletushka të shpërndara me figurën e deputetit të Prilepit nga radhët e VMRO-DPMNE-së, Dimitar Stevananxhija, me porosi “Ju falemnderit që më votuat, që të mundem ta punësoj gruan”.
Fletushkat shfaqin edhe një dokument të lëshuar nga ISHP Qendra shëndetësore – Prilep, në të cilin shkruan se që nga viti 2005 deri në vitin 2015, në Qendrën shëndetësore, janë punësuar vetëm dy mjekë stomatologë, prej të cilëve njëri është pikërisht bashkëshortja e deputetit Stevananxhija. Mjekja e njëjtë, bashkëshortja e deputetit të Prilepit është edhe kandidati i vetëm i zgjedhur për udhëzim në specializim në stomatologjinë pediatrike parandaluese.
“Ju informojmë se që nga viti 2005 e deri më tani, janë punësuar dy mjekë në stomatologji: dr. Julijana Stevananxhija dhe dr. Katerina Talimxhioska”, shkruan në dokumentin e bashkangjitur në fletushkë.
Nga kjo marrëveshje e Qendrës shëndetësore (pas një kërkese me shkrim për qasje në informacionet me karakter publik, aplikanti i së cilës nuk shihet në dokumentin e bashkangjitur në fletushkë), e nënshkruar nga tashmë u.d. ish drejtori Petar Ristevski, është evidente se në 15 vitet e kaluara, në Qendrën shëndetësore ose siç e quajnë prilepasit “uredi”, kandidatët e vetëm që kanë qenë të denjë të fitojnë punësim, madje edhe miratim për specializim, janë bashkëshortet dhe funksionerët e lartë lokalë.
Ikja masovike e mjekëve nga Prilepi për punë në shtetet e BE-së është e dhënë shumë e njohur për prilepasit dhe fakt (problem) me të cilin pacientët ballafaqohen në përditshmëri. Por, a është rastësi që mjekët “tjerë” që po punësohen të jenë bashkëshortë ose familjarë të funksionerëve partiakë ose kjo është vetëm “ana e errët” e projektit – “Maqedonia punëson”, mund të qëllohet symbyllurazi.
Në dokumentin e shpërndarë në pjesën e pasme të fletushkës, me qëllim ose për shkak të një lëshimi, zbulohet edhe identiteti i kandidatit i cili është dashur të punësohet në ISHP Qendrën shëndetësore – Prilep deri në fund të vitit 2015: “Kah fundi i këtij viti, më saktësisht kah mesi i muajit dhjetor të vitit 2015, duhet të punësohet edhe një mjek në stomatologji, dr. Mitko Dimitriovski”.
Si kanë mundur ta dinë autorët e dokumentit se kush do të punësohet gjatë vitit? A ka qenë konkursi “i menduar” për një person konkret? A ka personi i përmendur suksese dhe merita specifike që të hyjë “pa rend” në listën për punësim apo e ka “xhaxhain peshkop”?
Bozhidar Barllakovski
Përktheu nga maqedonishtja: Arsim Jonuzi
