Me një konferencë për media të mbajtur sot në orën 11:00 në Qendrën e Burimeve Qytetare në Shkup, CIVIL-i e nisi zyrtarisht programin nëntëditor “Mbrojtja e Demokracisë: Horizontet e Lirisë”, i cili do të kulmojë me një konferencë ndërkombëtare më 12 dhjetor.
Xhabir Deralla, kryetar i CIVIL-it, dërgoi një mesazh të fuqishëm, të qartë dhe alarmues për gjendjen e demokracisë sot. Ai theksoi se ky nuk është vetëm edhe një aktivitet tjetër, por “një thirrje për vigjilencë, për veprim të përbashkët, për përgjegjësi të ripërtërirë”.
Në fjalimin e tij, Deralla e vuri në dukje qartë ndryshimin dramatik të rrethanave në të cilat funksionojnë sot shoqëritë demokratike.
“Ne jetojmë në një kohë kur e vërteta vihet në dyshim, kur të drejtat e njeriut janë nën kërcënim, dhe demokracitë – si në vend, ashtu edhe në rajon dhe në mbarë botën – janë nën presion të fortë nga luftërat, regjimet autoritare dhe operacionet hibride”, tha ai.
Ai rikujtoi se vetëm para pak vitesh organizatat qytetare, mediat dhe institucionet merreshin me promovimin dhe zhvillimin e vlerave demokratike, por sot “kjo sferë po shndërrohet në një sferë mbrojtjeje – mbrojtje të vlerave, institucioneve dhe dinjitetit njerëzor”.
Deralla paralajmëroi se është e domosdoshme që shtetet evropiane dhe ato demokratike të jenë të vendosura:
“Ka ardhur koha të ndërmerren hapa urgjentë dhe të vendosur për t’i dhënë fund imperializmit, agresionit dhe autoritarizmit që e rrezikojnë sigurinë dhe e shtrembërojnë diskursin publik.”
Programi, i cili do të zgjasë nga 5 deri më 12 dhjetor, përfshin aktivitete mediatike, paraqitje publike, punëtori të specializuara, tryeza të rrumbullakëta me ekspertë dhe një konferencë ndërkombëtare.
“Kjo programë ndërton ura midis përvojës lokale dhe sfidave globale; midis shkencës, gazetarisë, sektorit civil dhe komunitetit diplomatik,” tha Deralla.
Temat kyçe do të jenë:
operacionet hibride ruse,
roli i mediave në epokën e pas-së-vërtetës,
ndikimet autoritare në rajon dhe në Evropë,
zhvillimi eksploziv i inteligjencës artificiale në kontekste ushtarake dhe informative.
“Këto janë tema që tashmë e përcaktojnë të ardhmen tonë. Prandaj duhet t’i kuptojmë, t’i analizojmë dhe të veprojmë,” theksoi Deralla.
“Duhet sinqerisht të përballemi me pyetjen: si e lejuam të thellohet erozioni i vlerave demokratike dhe kriza e institucioneve? Jo vetëm tek ne, por edhe në Evropë dhe në botë,” deklaroi Deralla, duke shtuar se këto trende negative nuk janë të izoluara, por pjesë e një përplasjeje globale midis demokracisë dhe autoritarizmit:
“Demokracinë nuk e mbron një organizatë, një institucion apo një gjeneratë e vetme. Demokracinë e mbron i gjithë shoqëria.”
Programi mban titullin “Horizontet e Lirisë”, por sipas Derallës, ai është shumë më tepër se një titull – është një vizion:
“Një vizion për një shoqëri në të cilën dinjiteti njerëzor është i pacënueshëm; ku informacionet janë të sakta, institucionet të forta dhe qytetarët të lirë të jetojnë pa frikë dhe manipulime. Një vizion në të cilin edhe shteti më i vogël ka zë dhe vend në familjen e demokracive.”
Deralla dërgoi mesazhin se demokracia duhet të mbrohet dhe të përparohet në mënyrë aktive, dhe se kjo është një detyrë e përbashkët e të gjithëve ne.
