LIRIA E SHTYPIT është nën sulm: Me ndikimin në rritje të dezinformatave, propagandës dhe gjuhës së urrejtjes, peizazhi politik po ndryshon. Në vend që të kërkohen masa për më shumë rregullim të platformave, luftë kundër gjuhës së urrejtjes dhe programe të edukimit mediatik – bëhen thirrje për kufizim të të drejtave të shtypit të lirë, më shumë presion mbi gazetarët dhe mungesë mbështetjeje për mediat në epokën e transformimit digjital. Por pa media dhe gazetari të pavarur, qytetarët evropianë mbeten të ekspozuar ndaj dezinformatave dhe luftës hibride nga Rusia dhe aktorë të tjerë, pa asnjë kundërpeshë: Lirinë tonë e mbron gazetaria e pavarur.
Ne, organizatat nënshkruese, u bëjmë thirrje të gjitha qeverive evropiane, parlamenteve kombëtare, Parlamentit Evropian dhe Komisionit Evropian të rezistojnë ndaj presioneve dhe kërcënimeve populiste, dhe të forcojnë lirinë e mediave në mbarë Evropën. EMFA dhe ligjet anti-SLAPP janë hapa të rëndësishëm në drejtimin e duhur, por duhet të pasohen nga një angazhim afatgjatë dhe i qëndrueshëm për të mbrojtur mediat e pavarura dhe për të siguruar qëndrueshmërinë e tyre.
Organizatat nënshkruese të kësaj deklarate të përbashkët shprehin shqetësim të thellë për zgjedhjet parlamentare të ardhshme në Republikën Çeke në tetor. Vendi rrezikon të ndjekë shembullin shqetësues të Hungarisë dhe Sllovakisë, ku lëvizjet populiste kanë kufizuar lirinë e shtypit dhe kanë minuar liritë civile. Duhet të mbrojmë këtë të drejtë thelbësore – gur themeli i demokracisë liberale – kundër këtyre sulmeve me një përkushtim të palëkundur ndaj lirisë së mediave. Evropa Lindore duket se është në pararojë të këtij trendi alarmues, duke e bërë edhe më urgjente nevojën që të gjitha vendet evropiane të bashkohen në mbështetje të demokracisë dhe rezistencës ndaj sulmeve populiste. Ne ftojmë organizata të tjera në mbarë Evropën të përkrahin dhe të përhapin këtë deklaratë, duke na u bashkuar në mbrojtjen e lirisë së shtypit dhe vlerave demokratike.
Mbrojtja e lirisë së mediave nuk mjafton. Duhet të ndërmarrim hapa konkretë për të ndërtuar themelet e një tregu mediatik evropian funksional. Kjo kërkon rregullim të fortë të platformave dhe sovranitet të vërtetë digjital – duke përfshirë zhvillimin e motorëve evropianë të kërkimit, platformave sociale dhe infrastrukturave të tjera digjitale të pavarura nga ndikimi i miliarderëve të Silicon Valley në SHBA, Partisë Komuniste të Pekinit apo autokratëve të Kremlinit.
Media Dialogue
Shoqata Gjermane e Gazetarëve (Deutscher Journalisten-Verband, DJV)
New European People’s Forum
Defending Democracy Global Initiative
Westminster Alliance for Ukraine
CIVIL – Qendra për Liri
