Disa organizata dhe iniciativa kryesore evropiane kanë lëshuar një deklaratë të përbashkët me thirrje për veprim të menjëhershëm për mbrojtjen e lirisë së mediave dhe përballjen me dezinformatat në Evropë. CIVIL është një nga gjashtë organizatat nënshkruese të Deklaratës, me titull “Në udhëkryq: Mbrojtja e lirisë së mediave fillon në Evropën Lindore”.
Organizatat paralajmërojnë për kërcënimet në rritje nga lëvizjet populiste, lufta hibride ruse dhe platformat digjitale të parregulluara.
Deklarata u prezantua më 3 shtator gjatë regjistrimit të një podcasti special dhe mbështetet bashkërisht nga: Media Dialogue, Shoqata Gjermane e Gazetarëve, Forumi i Ri Evropian i Popujve, Iniciativa Globale për Mbrojtjen e Demokracisë, Aleanca Westminster për Ukrainën dhe CIVIL – Qendra për Liri.
Në panel mori pjesë edhe Sekretari i Parë i Unionit Kombëtar të Gazetarëve të Ukrainës (NUJU), duke sjellë informacione jetike nga një vend që ndodhet në vetë qendrën e agresionit rus.
Çështjet kryesore
Liria e mediave nën presion: Forcat populiste në Evropë po minojnë gazetarinë duke kufizuar të drejtat, duke rritur presionin mbi gazetarët dhe duke mos ofruar mbështetje për mediat e pavarura në epokën digjitale.
Lufta hibride ruse: Pa gazetari të fortë dhe të pavarur, qytetaret dhe qytetarët mbeten të pambrojtur ndaj dezinformatave dhe fushatave propagandistike, sidomos atyre të orkestruara nga Rusia dhe aktorë të tjerë autoritarë.
Trende alarmante në Evropën Lindore: Deklarata vë në dukje zgjedhjet parlamentare të ardhshme në Çeki në tetor, duke paralajmëruar për situata të ngjashme me Hungarinë dhe Sllovakinë, ku qeveritë populiste tashmë kanë kufizuar lirinë e mediave dhe të drejtat civile.
Thirrje për veprim
Nënshkruesit u bëjnë thirrje qeverive evropiane, parlamenteve, Parlamentit Evropian dhe Komisionit Evropian që të:
rezistojnë presionit dhe kërcënimeve populiste;
forcojnë liritë e mediave në mbarë Evropën;
ndërtojnë mbi EMFA dhe legjislacionin anti-SLAPP me mbështetje afatgjatë për gazetarinë e pavarur;
ndërmarrin hapa konkretë për krijimin e një tregu mediatik evropian funksional me platforma dhe sovranitet digjital.
Një vizion për mediat evropiane
Deklarata thekson se vetëm mbrojtja e lirisë së mediave nuk mjafton. Evropa duhet të krijojë infrastrukturë digjitale të pavarur – motorë kërkimi, platforma sociale dhe mjete të tjera – të lira nga ndikimi i gjigantëve teknologjikë të SHBA-së, Partisë Komuniste të Kinës dhe Kremlinit.
CIVIL – Qendra për Liri
Në udhëkryq: Mbrojtja e lirisë së mediave fillon në Evropën Lindore
