Nëse flasim për nacionalizëm, duhet të bëjmë një dallim. Po flasim për Gostivarin, apo po flasim për gjithë vendin. Gostivari asnjëherë nuk ka qenë qytet “nacionalist”, gjë që nuk mund ta them për gjithë Maqedoninë. Nëse flasim për këtë periudhë, po, disa gjëra janë vënë në rregull, por gjithsesi nuk është ashtu siç duhet. Nuk do të hyj në detaje, nuk do të fajësoj partitë politike apo të tjerët, të gjithë jemi fajtorë. Problemi nuk është vetëm para fushatave zgjedhore, thotë këshilltarja në komunën e Gostivarit, Sebajete Zenku, në fjalimin e saj në ngjarjen “Dialogje qytetare për marrëdhëniet ndërmjet komuniteteve: Sfidat dhe zgjidhjet”.
Zenku thotë se partitë politike janë ato që propagandojnë nacionalizmin dhe mediat e përhapin atë. Nacionalizmi nuk është vetëm problem social por edhe familjar. Në familje flitet pak për respektimin e diversitetit. Ndryshimet nisin nga vetja jonë.
“Para disa vitesh, në një trajnim në Strumicë, një nga organizatorët më tha, shpresoj se do të na kuptoni në Strumicë, sepse këtu nuk flasin shiptar. Më vjen mirë që situata tani nuk është si më parë, ka ndryshime të mëdha, por kjo nuk duhet të na bëjë të kënaqur. Ne nuk duhet të punojmë vetëm me njëri-tjetrin, por duhet të punojmë edhe pranë njëri-tjetrit”, shtoi Zenku.
D. Tahiri
Kamera: Dehran Muratov
Montazhi: Arian Mehmeti
Fotografia: Goran Naumovski
