Kryetari i Komunës së Çairit, Visar Ganiu, në fjalimin e tij në konferencën “Marrëdhëniet ndërmjet komuniteteve: Perceptimet, shpresat dhe frika, sfidat dhe zgjidhjet” organizuar nga CIVIL-Qendra për Liri, theksoi se Çairi është Maqedonia e Veriut në miniaturë dhe se është një pasuri e madhe.
Komuna e Çairit konsiderohet komunë multikulturore dhe multietnike, dhe ai diversitet kuptohet si një nga thesaret tona të mëdha. Ashtu si Kumanovë, edhe në Komunën e Çairit, siç thatë ju, Maqedoninë e Veriut e kemi në formë të vogël në komunat tona. Këtu përveç shqiptarëve dhe maqedonasve jetojnë edhe turq, boshnjakë, romë e të tjerë, që është vërtetë një thesar i madh.
Do të filloja nga shkollat fillore, sepse për ta kultivuar bashkëjetesën, duhet ta bëjmë që në moshë të vogël. Në këtë kontekst nuk kemi asnjë problem. Madje mund të them se kemi hapa mjaft të avancuar në atë pjesë, sepse e dini se nga nëntë shkollat tona fillore, 6 janë multietnike, ku mësohet në disa gjuhë, thotë Ganiu.
Ai theksoi se në shkolla nuk ka probleme etnike, shkollat janë multietnike. Gjuha turke dhe boshnjake zbatohen si gjuhë zyrtare në komunën e Çairit edhe pse ligjërisht nuk u takon. Kishte një konsensus për këtë dhe të gjitha partitë politike dhe grupet etnike u pajtuan me këtë.
I festojmë edhe Pashkët edhe Bajramin,të punësuarit festojnë bashkë, thotë kryetari i Komunës së Çairit.
Në Çarshinë e Vjetër të Shkupit mund ti gjeni të gjitha kulturat ku qytetarët rrinë, pinë kafe, çaj dhe shumica e qytetarëve e marrin bukën prej andej. Jemi duke punuar për të rikthyer shkëlqimin e Çarshisë së Shkupit dhe në këtë mënyrë të rrisim prezencën e turistëve, tha Ganiu.
Ai theksoi se bashkëpunojnë mirë me komunat fqinje, por se komuna Çair ka edhe bashkëpunim ndërkufitar.
Kamera: Atanas Petrovski
Montazhi: Arian Mehmeti
Fotografia: Biljana Jordanovska
