Unë nuk jam në kampin e pesimistëve dhe konsideroj se deri në fund të muajit do të gjendet zgjidhje për kontestin me Bullgarinë dhe do të ketë epilog sa i përket paqes, stabilitetit dhe të ardhmes, theksoi sonte në konferencë për media kryetari i Bashkimit Demokratik për Integrim (BDI), Ali Ahmeti, njofton MIA.
“Tani këtë proces e lehtëson presidenti Makron. Unë besoj shumë në të ardhmen dhe për këtë besoj në zgjidhje në fund të qershorit, sepse ka angazhim shumë të madh të miqve tanë dhe aleatëve dhe për këtë besoj në përcaktimin e tyre dhe lehtësimin të cilin presidenti Makron e merr mbi vete që Ballkani të jetë më i sigurt, më i mbrojtur, më i qetë, sepse mjafton të lëmë vakum ose tema të hapura dhe të pazgjidhura ose që t’i zvarrisim problemet që të kemi çfarëdo lloj shkëndijash këtu”, tha Ahmeti, duke u përgjigjur në pyetjen e gazetarëve pas publikimit të rezultateve nga zgjedhjet në degët partiake.
Ahmeti potencoi se ata janë për zgjidhje të problemeve dhe konsideron se edhe për Bullgarinë është mirë që të gjendet zgjidhje.
“Qëllim i veprimit tonë si parti politike, por edhe komunikimit të përditshëm të cilin e kemi me partnerët tanë të koalicionit dhe me partnerët opozitarë, themi se tani është momenti dhe tani duhet të gjejmë zgjidhje dhe duhet të demonstrojmë guxim, por për të mirën edhe të shtetit tonë por edhe të Bullgarisë është që kjo çështje dhe ky epilog të jetë pozitiv”, tha ai.
