Pritet që sot të takohen delegacionet e Ukrainës dhe të Rusisë në rrethin e ri të negociatave, njofton DPA, transmeton MIA.
Dy ekipet negociuese duan që diskutimet, që do të zhvillohen përmes video lidhjes, të fillojnë sot në mëngjes. Sipas Mihailo Podljak, këshilltar i presidentit ukrainas Vollodimir Zelenski, grupet e punës të dy palëve punojnë në mënyrë intensive.
Bisedimet e fundit midis Ukrainës dhe Rusisë në nivel të lartë janë mbajtur të hënën, njofton DPA. Podljak parashikon se bisedimet për t’i dhënë fund luftës do të vazhdojnë edhe disa javë.
Pozita e palës negociuese ruse u bë “më e arsyeshme” dhe më reale, theksoi ai, pa dhënë detaje. Rusia dëshiron që Ukraina të mbetet vend neutral dhe të demilitarizohet, si dhe t’i njohë rajonet separatiste në pjesën e saj lindore si shtete të pavarura.
Kievi është gati të bëjë kompromis për kërkesën e tij për neutralitet, por këmbëngul në garanci të forta perëndimore për sigurinë e tij.
Megjithatë, autoritetet ukrainase refuzojnë të tërhiqen për çështjen e integritetit territorial të vendit, thekson DPA.
Presidenti ukrainas Zelenski insiston në takim me homologu e tij rus Vlladimir Putin. Tani për tani Kremlini refuzon ta shqyrtojë atë opsion.
