Zëvendëskryeministri për Çështje Evropiane, Bojan Mariçiq sot kishte takim me ambasadorin japonez Hironori Savada për të riafirmuar mbështetjen e Japonisë për Maqedoninë e Veriut përmes donacioneve në disa nga sektorët më të rëndësishëm për rrugën evropiane të vendit, si dhe përkrahja e Qeverisë së Maqedonisë në përmirësimin e jetës së qytetarëve sipas standardeve të vendeve të zhvilluara, informon agjencia e lajmeve MIA.
Në takim, siç theksohet në kumtesën e SÇE-së, është biseduar edhe për bashkëpunimin e deritanishëm dypalësh, për realizimin e suksesshëm të projekteve nga grantet japoneze, si dhe për promovimin e bashkëpunimit me marrëdhënie të reja afariste dhe investime.
Mariçiq shprehu mirënjohjen e tij ndaj ambasadorit Savada për mbështetjen e deritanishme në kuadër të ndihmës zyrtare japoneze për zhvillim (ODA) dhe vuri në dukje se ka gjithmonë hapësirë për thellimin e bashkëpunimit.
“Në kohën e pandemisë, paralelisht edhe reformave të intensifikuara në vend, financimi i projekteve zhvillimore për zhvillim të qëndrueshëm ekonomik dhe social është thelbësor për vendin dhe integrimin e tij evropian”, tha Mariçiq.
Japonia, siç thekson SÇE-ja është një nga donatorët dhe mbështetësit tanë më të mëdhenj të integrimit tonë evropian dhe në këtë drejtim do të ndahet mbështetja financiare për projektet që do të kontribuojnë në realizimin e agjendës evropiane.
Prandaj, periudha e ardhshme do të fokusohet në realizimin e projekteve në fushën e shëndetësisë, arsimit dhe mjedisit jetësor.
Në dy vitet e fundit, Japonia ka dhënë mbi 800 mijë euro për ndihmë emergjente për institucionet shëndetësore që merren me kovid-19, përkatësisht për blerjen e pajisjeve mjekësore për kovid qendrat në vend.
