Nga 1 dhjetori do të hyjë në fuqi ndalesa për qese plastike, gjegjësisht do të lejohet shitja vetëm e qeseve të biodegradueshme për të cilat do të paguhet prej 15 denarë për fond special për mjedis jetësor.
Këtë sot e kumtoi ministri i Mjedisit Jetësor dhe Planifikimit Hapësinor, Naser Nuredini në konferencën e përbashkët për media me kryeministrin Zoran Zaev në të cilën ishte prezantuar Plani Nacional për Menaxhim me Mbeturina 2021 – 2031.
“Ideja për çmimin e qeseve të biodegradueshme është që të ulet përdorimi i plastikës. Fondi që do të krijohet nga këto 15 denarë për çdo blerje të qeses do të shkojë në fond të posaçëm i cili do të investohet në mjedisin jetësor, por edhe do të investohet në vetëdijen e qytetarëve se si të menaxhojmë me mbeturinat në shtetin tonë. Ideja është që ai që ndot edhe të paguajë, dhe në këtë mënyrë prodhuesit të cilët do të sjellin produkte në shtetin tonë duhet të kontribuojnë edhe në atë, dhe me këtë do të duhet të kontribuojnë për infrastrukturën me kontejnerë të ndryshëm në shtetin tonë ku ne si qytetarë do t’i selektojmë mbeturinat dhe me këtë do të krijojmë sistem në të cilin vetë qytetarët do të selektojnë mbeturinat”, sqaroi Nuredini.
Nga 1 dhjetori, siç informoi, do të ndalohet plastika për përdorim të njëfishtë në objektet hotelierike në zonat e mbrojtura – kjo nënkupton Pelister, Mavrovë, Mali Sharr, etj.
