Kryetari i Komunës së Çairit, Visar Ganiu me drejtorin e NP “Higjiena Komunale” Abdusamed Shabani sot në terren ishin për ta vëzhguar pastrimin e mbetjeve ndërtimore në stadiumin e K.F. “Shkupi” dhe mbeturinave në bul. Brigada Maqedonase – Kosovare në afërsi të lagjes Tophanë e Vjetër.
“Sot, në koordinim me komunën e Çairit, ekipet tona hoqën sasi të madhe të mbetjes së parregullt të hedhur në dy vende në këtë komunë të Shkupit. Me këtë rast do të doja të bëj thirrje deri te banorët e qytetit të Shkupit që mbetjen e tyre të mos e hedhin në sipërfaqet publike, për arsye se çdo vit vërejmë rritje drastike të sasisë së mbetjes nga deponit e paligjshme të cilat i pastron NP Higjiena Komunale – Shkup, ndërsa gjatë tri viteve të fundit numrat rriten madje për dhjetë herë. Vetëm me hedhjen e duhur dhe të ndërgjegjshme të mbetjes mund ta mbrojmë mjedisin jetësor dhe shëndetin publik”, tha drejtori i NP Higjiena Komunale – Shkup, Abdusamed Shabani.
