Fondacioni Fridrih Ebert – zyra Shkup dhe Civil -Qendra për Liri organizojnë panel në temën “ Perspektiva rinore për integrimin e Maqedonisë në BE” që do të mbahet sot në ora 11.45 – 13.00 në ballkonin verior të Muzeut të Arteve Bashkëkohore të qytetit të Shkupit. Paneli do të organizohet me rastin e vizitës zyrtare të Ministrit Shtetëror të Gjermanisë për Evropë, Mihael Rot.
Kjo është mundësi e veçantë për përfaqësuesit e organizatave rinore në Maqedoni si dhe për pjesëmarrësit tjerë, t’i ndajnë përvojat dhe qëndrimet e tyre për proceset eurointegruese të vendit dhe të provojnë, së bashku me mysafirin e lartë, të përgjigjen në pyetjen.
Në cilën mënyrë anëtarësia në BE do të kontribuojë për avancimin e mundësive të të rinjve në vend në aspektin e arsimit, punësimit, menaxhimin me krimin dhe korrupsionin, përfshirjen dhe pjesëmarrjen në proceset demokratike në nivel nacional dhe lokal?
Diskutimi do të zhvillohet në gjuhën angleze. Organizatorët do të sigurojnë video transmetim, ndërsa komuniteti onlajn do të mund të parashtrojë pyetje dhe të komentojë në rrjetet sociale. Hashtag: #MKyouthEU
