Lideri i BDI-së Ali Ahmeti pas takimit me komisarin për zgjerim Johanes Han tha se raporti i progresit të KE-së për Maqedoninë është e arritur e përbashkët duke shtuar se mbeten akoma punë për tu bërë në rrugëtimin euro-atlantik të vendit.
“Gjysmëfinalen e kaluam me sukses, për finale kemi akoma punë, por jemi gati dhe të përkushtuar për ta kurorëzuar rrugën tonë me sukses”, tha Ahmeti duke shtuar se e ka falënderuar Hanin për angazhimin e tij, për përkushtimin e tij në Republikën e Maqedonisë për të arritur një sukses jo edhe të pa pritshëm për vendin.
Ahmeti theksoi se ky sukses nuk duhet të na vë në gjumë por përkundrazi duhet shumë më shumë angazhim nga të gjitha forcat politike që të kapim hapin e duhur drejt fillimit të negociatave për anëtarësim në BE.
Ai përmendi se na presin punë shumë të rëndësishme, duke filluar nga reformat në gjyqësi, lufta kundër krimit dhe korrupsionit si dhe zbatimin e të gjitha rekomandimeve që dalin nga Brukseli që sa më shpejt të fillojmë negociatat për anëtarësim.
“Nga ne pritet që të jemi shumë më aktiv, jo vetëm si parti politike në pushtet por në tërësi si parti politike sepse punohet për të ardhmen e vendit tonë, sepse çdo sukses është edhe i opozitës, pra është sukses i përbashkët i të gjitha subjekteve politike”, ka thënë Ahmeti.
Burimi: MIA
