Sindikata e punëtorëve nga administrata, organet gjyqësore dhe shoqatat e qytetarëve (AOGJSH) reagon ndaj deklaratave të kryeministrit për joproduktivitet të administratës dhe për atë se të punësuarit nuk meritojnë rritje të rrogave.
Për AOGJSH-në, deklaratat e tilla janë të papranueshme dhe me to kryeministri e përgjithëson gjendjen dhe krijon përshtypje se të gjithë të punësuarit në administratë janë jopunëtorë.
“Qëndrimi i tij se administrata nuk punon dhe se punon në parimin ‘luaj derën merr rrogë’, në të vërtetë tregon se qeveria, ministrat, drejtorët, udhëheqësit e sektorëve dhe reparteve të cilët i emëron Qeveria, janë ata të cilët duhet të jenë përgjegjës për menaxhimin e keq dhe fajin duhet ta kërkojë tek ata, e jo tek nëpunësit e administratës”, thonë nga AOGJSH.
Nga Sindikata kërkojnë nga kryeministri t’i rishqyrtojë qëndrimet e këtilla dhe, siç thonë, në vjeshtë presin rritje të rrogave të të punësuarve në administratë dhe sektorin publik.
“Sindikata e AOGJSH-së dëshiron ta pyesë kryeministrin nëse e din se sa janë të ardhurat e të punësuarve në administratë, sepse këta të punësuar nuk kanë regres për pushim vjetor, kur ka qenë rritja e fundit e rrogave të tyre, nëse kanë kushte themelore për punë dhe nëse janë viktima të mobingut mu për shkak të drejtorëve apo udhëheqësve të vendosur politikisht? Nëse kryeministri mund të sqarojë përse të punësuar me përvojë pune tashmë mbi 25 vite ende kanë status të referentit të ri, ndërsa të sapopunësuar pa asnjë ditë përvojë pune bëhen udhëheqës, drejtorë e madje edhe ministra? Përse, për t’u zbatuar disa dispozita ligjore të cilat janë në dobi të punëtorit duhet të intervenojnë shërbimet inspektuese dhe të kërkohet mbrojtje gjyqësore dhe përse ende paguhen rroga me rregullore dhe vendime në vend se me marrëveshje kolektive dhe ligje”, pyesin nga AOGJSH.
Burimi: MIA
