Presidenti i Republikës së Kosovës, Hashim Thaçi, sot ka pritur Kryeministrin e Republikës së Bullgarisë, Bojko Borisov, me të cilin ka biseduar për thellimin e marrëdhënieve ndërmjet dy shteteve dhe për perspektivën evropiane të Kosovës dhe vendeve të Evropës Juglindore.
Me këtë rast, presidenti i Kosovës, Hashim Thaçi, tha se me kryeministrin e Bullgarisë ka folur mes tjerash për dialogun me Serbinë dhe stabilitetin rajonal.
“E falënderoj kryeministrin e Bullgarisë për vizitën dhe vëmendjen e vazhdueshme për vendin tonë. Me kryeministrin Borisov patëm një takim të shkëlqyer. Diskutuam për rrugën evropiane të Kosovës dhe për marrëdhëniet mes dy vendeve. Biseduam që Kosova të jetë pjesë e NATO-s dhe BE-së”, theksoi Thaçi pas takimit.
Pas takimit me presidentin e Kosovës Hashim Thaçi, në vijim janë bisedimet me kryeministrin Ramush Haradinaj.
Duke thënë që dialogu është i pa alternativë, Borisov tha se Kosova dhe Serbia duhet të punojnë në normalizimin e marrëdhënieve të tyre.
“Dialogu është i pa alternativë. Ju jeni të detyruar që bashkë me serbët të zgjidhni këtë mosmarrëveshje me njëri-tjetrën. Po ju drejtohem gjithë liderëve të Ballkanit, lëreni në një anë egoizmin sepse kjo po shkakton probleme në rajon”, tha kryeministri bullgar.
Në suaza të vizitës njëditore, Borisov do të realizojë takim edhe me shefat e misioneve të BE-së në Kosovë.
Burimi: MIA
Përmbajtjet që i merr Civili nga burime tjera nuk i nënshtrohen licencës Creative Commons 1.0, e cila përndryshe është e zakonshme, për përmbajtjet të cilat i plason kjo platformë mediatike. Ju lutemi, konsultohuni me buruesit për marrje të përmbajtjeve të tilla.
