Gjykata supreme e Republikës së Maqedonisë praktikisht e anuloi radhitjen e re të gjykatësve në Gjykatën Penale të Shkupit, duke i pranuar shtatë ankesat e gjykatësve të cilët nuk ishin të kënaqur nga vendimi i drejtoreshës së përkohshme Tatjana Mihajllova për zhvendosjen e tyre. Në seancën e djeshme, e cila ishte e mbyllur për publikun, gjykatësit supremë duhej të vendosin edhe për ankesat për orarin e tyre të ri, por vendimi u prolongua për të hënën. Të hënën do të vendoset edhe për atë se cili gjykatës do ta udhëheq rastin për vlerësimin e jashtëzakonshëm të Këshillit Gjyqësor për zgjedhjen e “shefit” të ri të Gjykatës Supreme, lëndë në të cilën ankohet gjykatësja Lidija Nelkova.
Tetë nga gjykatësit e zhvendosur akuzonin se pas kësaj radhitjeje qëndron Presidenti i mëparshëm i gjykatës, Vlladimir Pançevski, sepse bëhet fjalë pikërisht për ata gjykatës të cilët publikisht e kritikuan mënyrën e tij të punës, si dhe gjykatës të cilët paraprakisht kanë pranuar ankesa nga PSP!
Pas akuzimeve, Gjykata penale doli me lajmërim se ndryshimet në radhitjen e gjykatësve janë ligjërisht të shëndosha, si dhe se nuk kanë prapavijë politike, por vendimi i djeshëm i Gjykatës supreme i demaskoi këto argumente.