Në qendrën ditore për fëmijë nga rruga dhe në çerdhen “8 prilli” në Shuto Orizarë, dje, shpërtheu zjarr i fuqishëm dhe i tërë objekti i cili ka dy hyrje të veçanta, tërësisht u shndërrua në hi. Rreth 100 fëmijë të cilët e vizitojnë Qendrën ditore për fëmijë nga rruga, tani kanë mbetur edhe pa përkujdesje dhe pa vaktin e ngrohtë që e pranonin derisa e vizitonin qendrën. Gjithashtu, pa përkujdesje dhe edukim mbetën edhe rreth 100 fëmijë të cilët shkonin në çerdhen “8 prilli”.
Video regjistrimin nga zjarri , deri te CIVIL Media e dërgoi gazetari qytetar Manuel Mustafa.
Irena Vellkoska, udhëheqësja e Qendrës ditore, në bisedë për CIVIL Media thotë se për momentin ka mbështetje nga organizatat joqeveritare Rome të cilat gjenden në Shuto Orizare dhe të cilat do të përkujdesen për fëmijët derisa të gjendet zgjidhje përkatëse.
“Ne jemi të habitur! Rreth 100 fëmijë përsëri do të mbeten në rrugë dhe do të kthehen në shtëpizat e improvizuara, sepse nuk besoj se do të shkojnë në shkollë. Deri tani asnjë nga institucionet përkatëse nuk ka ardhur dhe nuk ka ofruar ndihmë. Çfarë do të ndodhë në të ardhmen, nuk e di, por më vjen keq për fëmijët të cilët filluan të fitojnë shprehi edukuese dhe arsimore. Tani frikohem se do t’u kthehen shprehive të vjetra”, thotë Vellkoska.
Për momentin nuk ka përgjigje për shkakun e zjarrit, por disa nga qytetarët komentuan se zjarri ka shpërthyer për shkak të instalimit të vjetruar elektrik, madje pati edhe komente se zjarri është i nxitur qëllimisht.
Dehran Muratov
