Pas tërheqjes së shortit në Komisionin Shtetëror Zgjedhor, u përcaktua rradhitja e partive në fletëvotim. Në zgjedhjet do të marrin pjesë gjashtë parti politike dhe pesë koalicione me 58 lista të kandidatëve, ndërsa për ofertën e tyre politike më 11 dhjetor, do të pronocohen 1.784.524 qytetare dhe qytetarë me të drejtë votimi.
Në zgjedhjet, të cilat pas dy vitesh prolongimi, do të mbahen më 11 dhjetor, VMRO-DPMNE dhe koalicioni “ Për Maqedoni më të mirë”, do të jenë nën numrin një në fletëvotim.
Nën numrin 2 është Partia Demokratike Shqiptare (PDSH), ndërsa “treshi” është Bashkimi Demokratik për Integrim (BDI).
Koalicioni opozitar “Për Maqedoni të lirë” në krye me LSDM është nën numrin katër.
Numri pesë në fletëvotim është për koalicionin “Për ndryshime dhe drejtësi –Blloku i tretë” (DS, FRODEM, MORO-RP dhe DEMOS), “gjashtëshja” është për Partinë për Prosperitet Demokratik (PPD), ndërsa e shtata është koalicioni “Aleanca për Shqiptarët” 9Lëvizja për Reforma e PDSH, Uniteti dhe RDK).
Me numrin rendor tetë është Partia Liberale, ndërsa koalicioni “VMRO-Për Maqedoninë” (VMRO-NP, Të bashkuar për Maqedoninë dhe Dostoinstvo) është nën numrin rendor nëntë. “Dhjetëshja” është për Lëvizjen BESA, ndërsa nën numrin rendor 11 është partia E Majta.
