“Mladiinfo” organizon forum rinor me titull “Përfaqësimi i pakicave në mediat e reja në Evropën Qendrore dhe Lindore”, ku të rinjtë nga mbi 10 vende të Evropës do të diskutojnë se si mediat në vendet e tyre i paraqesin pakicat etnike, si mediat e reja evropiane përdorin stereotipet gjatë raportimit për emigrantët dhe krizën e refugjatëve, si dhe për atë se sa problemet e personave me aftësi të kufizuara fizike ose intelektuale fitojnë haësirë mediatike.
Përveç këtyre temave, forumi do të hapë dialog për shumë çështje të tjera që kanë të bëjnë me minoritetet dhe mediat. Forumi fillon nesër, më 3 mars, do të zgjasë tre ditë në hotel “Continental” dhe në të do të marrin pjesë 50 të rinj nga 14 vende të Evropës Qendrore dhe Lindore, duke përfshirë edhe Maqedoninë.
Në kuadër të forumit do të prezantohen rezultatet e Monitorimit Rajonal që është kryer mbi 15 medie të reja në Bullgari, Greqi, Kroaci dhe Maqedoni, të cilat duhet të tregojnë se si mediat e reja i përfaqësojnë pakicat etnike, emigrantët, refugjatët, azilkërkuesit, LGBT popullatën si dhe njerëzit me sfida fizike dhe intelektuale.
Në fund të forumit, do të paraqiten 10 rekomandime për mbulimin më të mirë mediatik të minoriteteve, si dhe për të promovuar diversitetin. Gjuha e punës së forumit është anglishtja.
