Shoqata e Gazetarëve të Maqedonisë (SHGM) dje festoi shtatëdhjetëvjetorin nga themelimi i saj. Në kremtim ishin të pranishëm shumë gazetarë, redaktorë dhe përfaqësues të komunitetit ndërkombëtar.
Me këtë rast u ndanë çmime në disa kategori. Gazetarja Mençe Toçi fitoi çmimin “Jashar Erebara” për gazetari hulumtuese, për tre tregime në lidhje me polemikat që pasuan lidhur me ndërtimin e qendrës mjekësore “Nënë Tereza”, për tenderin e Ministrisë së Shëndetësisë i cili mund të falimentojë spitalet dhe për ilaçet me kualitet të dobët për fëmijët me autizëm.
Çmim fitoi edhe Svetlana Darudova nga gazeta “Dnevnik” për hulumtimin në lidhje me problemin mes pensionistëve dhe Fondit për Sigurim Pensional dhe Invalidor.
Çmimin për vepër jetësore “Krste Misirkov” sivjet e fitoi Atanas Kostovski, komentator dhe redaktor shumëvjeçar në redaksinë e sportit të RTVM.
Ndërmjetësuesi Peter Vanhaute për mendimet e tij që i botonte në Tweeter të shoqëruara me fotot e maceve, fitoi një stoli simbolike në formën e të macës.
