Një delegacion i Lëvizjes Besa, i udhëhequr nga kryetari i saj Bilall Kasami, vizitoi sot CIVIL – Qendrën për Liri. Në takim me presidentin e organizatës, Xhabir Deralla dhe me një pjesë të ekipit të CIVIL-it, u diskutua për zgjedhjet e ardhshme parlamentare, për parakushtet e plotësuara deri më tani për relaizimin e tyre, si dhe për mënyrat përmes të cilave do t’u jepej mundësi qytetarëve që të shprehin vullnetin e tyre lirshëm dhe pa pengesa.
Përveç shkëmbimit të vlerësimeve mbi situatën aktuale dhe aktivitetet të cilat i zbatojnë në kontekstin zgjedhor, Kasami dhe Deralla diskutuan për mundësitë e bashkëpunimit dhe shkëmbimit të informatave dhe përvojave mes partive politike dhe vëzhguesve të CIVIL-it, me qëllim të zbatimit dhe monitorimit sa më të mirë dhe më kualitativ të procesit zgjedhor.
Kryetarët e Besës dhe CIVIL-it së bashku ndajnë shqetësimin me gjendjen aktuale në vend, si dhe përpjekjet për të siguruar kushte të vërteta, e jo vetëm minimale, për realizimin e zgjedhjeve të lira.
