Kryeministrat Zoran Zaev dhe Edi Rama, në kornizar e “Samitit 100”, konstatuan se Republika e Maqedonisë dhe Republika e Shqipërisë kanë marrëdhënie politike të shkëlqyera. Në takimin bilateral mbrëmë, u hapën çështje të cilat janë bazë e mirë për intensifikimin e bashkëpunimit, në drejtim të aplikimit të standardeve evropiane, bashkëpunimit ekonomik dhe sigurimit të kushteve për integrime euroatlantike për tërë rajonin.
“Qeveria e Maqedonisë do të vazhdojë me zhvillimin e marrëdhënieve të fqinjësisë së mirë përmes frymës miqësore, kështu që edhe më tej do të kontribuojë për zhvillimin rajonal, dhe me qëllim të hapjes së perspektivave për NATO dhe BE, të cilat janë qëllime strategjike të shtetit”, tha Kryeministri Zaev.
Siç kumtoi shërbimi për shtyp i Qeverisë, Rama e ka uruar Zaevin për realizimin e zgjedhjeve vendore korrekte dhe demokratike.
Në takim u shqyrtuan mundësitë për avancimin e bashkëpunimit ekonomik dhe tregtar mes Republikës së Maqedonisë dhe Republikës së Shqipërisë.
Në takimin është theksuar se pjesëmarrja e përbashkët në “Samitin 100” në Shkup, është dëshmi për vullnetin politik për zhvillimin e bashkëpunimit ekonomik, për ndërlidhjen e komuniteteve të biznesit, për investime të përbashkëta, ndërthurje dhe lidhje transporti. Është shprehur edhe pritja se BE do t’i njeh dhe mbështet angazhimet e shteteve nga rajoni, për thellimin e bashkëpunimit të nevojshëm rajonal dhe për integrimet në BE, si dhe për nevojat e qytetarëve nga rajoni.
Në takim është arritur marrëveshje që së shpejti të intensifikohen aktivitetet për seancë të përbashkët të Qeverive të Republikës së Maqedonisë dhe Republikës së Shqipërisë.
